Оңтүстік Қазақстанда жаңа зауыт іске қосылды

Шымкентте полиуретанды ортопедиялық бұйымдар жасайтын зауыт іске қосылды, деп хабарлады 24.kz. Кәсіпорын медицинаға қажетті 17 түрлі өнім шығарады. Мәселен, түрлі-түсті дәкеден бастап, сүйекті қозғалтпай ұстап тұратын құрсауға дейін әзірлейді. Ол гипстен 14 есе мықты әрі жеңіл, эластикалық иілгіш, сондай-ақ құрғақ жерде тез қататын қасиеті бар. Жалпы құны 300 млн теңгеден асатын кәсіпорында 50 адам жұмыс істейді. Оңтүстіккореялық технологиямен жасалып жатқан отандық өнімнің ТМД елдері аумағында баламасы жоқ. «Marai E7 Group» зауыты биыл «СҚ-Фармация» ЖШС-мен 10 жылға ұзақ мерзімді келісімге қол қойған. Болашақта отандық өнімді ішкі нарықпен қатар Түркия, Өзбекстан және Қырғызстан елдеріне экспорттау жоспарда тұр. «Судан, ылғалдан қорықпайды әрі рентген сәулесін 100 пайыз өткізеді. Аллергиялық қышу дене қышуына әкеліп соқтырмайды. Су болмаған жерде ауадан ылғал алып, өзі қатаятын қасиеті бар», – деді компания басшысы Гүлия Жүзенова.