Сертификатсыз газға сенбеңіз

Қазіргі таңда елімізде қорша­ған ортаны қорғауға, жасыл эконо­миканың дамуына, жаһандық ілгерілеу мен дамыған отыз елдің қатарына кіруге талпынып, түрлі шаралар қолға алынуда. Оңтүстік өңіріміздің көпшілігі табиғи газбен жабдықталған. Бұл да экологияны ластау мәселесін тежеудің бір амалы. Сол сияқты, қаладағы кө­лік­тердің де басым көпшілігі газ қондырғысына ауысқан. Оның нарықтық бағасының жанармай бағасынан арзандығы да тұрғындар қалтасына тиімді. Енді көкейге түйер бір мәселе, көліктеріне газ қондырғысын орнатқан тұрғындар оның қауіп­тілігі мен жауапкершілігін жоғары сезінуі керек. «Әрбір тұтынушы өз құқын біліп, сатушы алдында талап ете алса, қолайсыз жағдайлар мен келеңсіз жайттардың алдын алар еді. Мәселен, сіз газ құю стансасына көлігіңізге газ құю үшін барсаңыз, өнімнің сәйкестігін растайтын және өлшем құралдарының салыс­тыру-тексеруден өткендігі туралы сертификаттарын талап ете аласыз. Өлшем құралының салыстыру-тексеруден өткендігі туралы серти­фикат сол құралдың дәлме-дәл өлшем нәтижесін беретіндігін растайды. Мұндай құжатсыз құ­рал өлшем нәтижелеріне кепіл бола алмайды. Бұл «Өлшем бірлігін қамтамасыз ету тура­лы» заңмен реттелген. Заң талап­тарына сәйкес, мемлекеттік метро­логиялық бақы­лауға жататын кез келген өлшем құралы серия­мен шығарылады немесе елі­мізге партиялармен әкелініп, қолдануға арналған өлшем құралдары пайдалануға берілу алдында сынақтан өткізіліп, бекiтiледі. Өлшем құралының бекiтiлген және метрологиялық атте­статтаудан өткендері өлшем бiрлiгін қамтамасыз етудiң мем­лекеттiк жүйесі тiзiмiне енедi», дейді Техникалық реттеу және метрология комитеті Астана қаласы бойынша департаментінің бас маманы Нұрболат Бекболатұлы. Оның айтуынша, бекіту мақсатында сынақтан немесе метрологиялық аттестаттаудан өтпеген өлшем құрал­дарын айналысқа шығаруға, пайдалануға беруге, қолдануға, өткі­­зуге және жарнамалауға тыйым салынған. Өндiрiстен неме­се жөндеуден шығарылған, пай­далану және импортпен әкелу кезiнде бекiтiлген, метрологиялық аттестаттаудан және өлшем бiрлiгін қамтамасыз етудiң мемлекеттiк жүйесi тiзiмiне тіркелген өлшем құралдары салыстырылып, тек­серiледi екен. Осы заң талап­тарын бұзған жеке және заңды тұлғаларға Әкімшілік құқық бұзушылық туралы кодекс аясында жауапкершілік қаралғанын естен шығармаған жөн. Сөз орайында айта кетсек, жақында Астана қаласы тұрғынының шағымы негізінде «Аль-Барс Газ» ЖШС көліктерге газ құю стансасына жоспардан тыс тексеріс жүргізілген. Нәтижесінде, қызмет көрсету орталығы салыстыру-тексеруден өтпеген және еліміздің өлшем бiрлiгiн қамтамасыз етудiң мемлекеттiк жүйесi тiзiмiне енбеген газ құю қондырғысын қолданатыны анықталды. Бұл қондырғы жұмыс істеген сәттен бастап жүргізілген сауда операцияларында халыққа сатылған газ көлемінің дәл есеппен жіберілмегенін білдіреді. Яғни, тұтынушының зардап шегуіне әкелетін ахуал. Шара соңында кәсіпорынға әкімшілік айыппұл салынып, жарамсыз деп танылған өлшем құралын қолданыстан алып тастауға нұсқаулық берілді. Және қоғам алдындағы жауапкершіліктері түсіндірілді. «Кез келген тұтынушы қандай салада болмасын, мемлекеттік метрологиялық қызметте қол­данылатын өлшем құралының заңсыз қолданысын байқаса, сауда операцияларын жасау кезiнде иеліктен шығарылатын тауар­лар санын, салмағын, көлемін, шығысын немесе басқа шамаларын анықтаудың дұрыстығына күмәнді болса, өлшеп оралған тауарлардың қаптамасында көрсетілген санға сәйкес келмеу фактісі анықталған жағдайда Техникалық реттеу және метрология комитетінің жергілікті департаментіне хат жолдауға құ­қылы», дейді құзырлы мекеме өкілі. Расында, арамызда өз құқын білмейтіндер көп-ақ. Біз құнттай бермейтін дүниелер ірілі-ұсақты заң бұзушылық әрекеттерге себеп болып жататынын түсінген дұрыс. Кейде, осындай болмашы ұқыпсыздығымыздан зардап шегіп, залалын тартатынымыз да жасырын емес. Сәл сергектік танытып, әр ісімізге жауапкершілікпен қарасақ, игі болар еді. Асхат Райқұл, «Егемен Қазақстан»