«Қайрат» Хорватия футболшысымен толықты

«Қайрат» футбол клубы хорватиялық жартылай қорғаушы Иво Иличевичпен толықты, деп хабарлайды vesti.kz. 30 жастағы футболшымен арадағы келісімшарт мерзімі 2+1 үлгісі бойынша жасалды. Хорватиялық ойыншы соңғы маусымды Ресейдің «Анжи» командасында өткізген. Ресей біріншілігінің алғашқы айналымында 14 кездесуге қатысып, 2 голдың және 1 нәтижелі пастың авторы атанған. Иво Иличевич Германияда туып-өскенімен 2010-2013 жылдар аралығында Хорватия ұлттық құрамасының намысын қорғады. 2012 жылы өткен Еуропа чемпионатына жарақат алғанына байланысты қатыса алмаған. Айта кетейік, «Қайраттың» жаңа ойыншысы Ресей чемпионатына ауыспай тұрып, немістің «Гамбург», «Бохум», «Гройтер Фюрт», «Кайзерслаутерн» және «Дармштатд» командаларында доп тепкен. Жалпы алғанда Бундеслигада 134 мәрте алаңға шығып, 18 рет гол соққан.