«Барыс» жарысты жалғастырады

  Бұрнағы күні Құрлықтық хоккей лигасының кезекті туры аясында Астананың «Барысы» өз мұз айдынында Новосібірдің «Сибирь» коман­дасымен күш сынасып, шиеленісті өткен ойында 2:1 есебімен жеңіске жетті. Астаналық ұжым үшін бұл тұрақты чем­пионаттағы 31-ші жеңіс еді. Соның арқа­сында жерлестеріміз осымен сегізінші рет турнирдің плей-офф кезеңіне шығып отыр. Ойынның негізгі уақытында соғылған қос шайба бірінші кезеңге тиесілі болды. Матчтың 8-минутында қонақтардың шабуылшы­сы Кирилл Воробьев есеп ашса, «Барыс» тарапынан қарымта голды 14-минутта Дастин Бойд соқты. Алма-кезек шабуылмен өткен кездесудің аяғына дейін осы есеп өзгермей, командалар қосымша уақыт ойнауға мәжбүр болды. Ал овертаймның соңғы секундтарында Найджел Доустың құлаштай соққан шайбасы «Барысқа» ауадай қажет үш ұпайды әкелді. Турнирдің келесі кезеңіндегі, яғни плей-офф сынындағы «Барыстың» қарсы­ласы белгілі. Ол – Челябінің «Трактор» командасы. Қазір жерлестеріміздің еншісінде 89 ұпай бар. Команда «Шығыс» дивизионы бойынша турнир кестесінде бесінші орында тұр. Енді олар қалған екі ойынды да өз айдынында өткізеді. Астана хоккей клубына қарсы «Металлург» (Новокузнецк) пен «Авангард» (Омбы) командалары ойнайтын болады. Еске салар болсақ, Астананың «Барысы» 2008-2009 жылдардағы маусымнан бастап тұрақты чемпионаттың плей-офф кезеңіне үздіксіз шығып келеді. Тек 2015 жылдың 16 маусымында ғана олар үздік сегіздіктің қатарына қосыла алмаған еді. Қайрат ӘБІЛДИНОВ, «Егемен Қазақстан» АСТАНА