Альварес Головкиннің салмағына ауысатынын айтты

WBO нұсқасы бойынша бірінші орта салмақта әлем чемпионы Сауль «Канело» Альварес (48-1-1, 34 КО) отандасы кіші Хулио Сезар Чавеспен (50-2-1, 32 KO) жекпе-жегінен кейінгі жоспары туралы ой бөлісті. Айтуына қарағанда, бұл айқастан кейін белбеуін қорғауды немесе салмағын көтеруді ойламайды екен. Қайта орта дивизионға ауысуды жоспарлап отыр. «Осы жекпе-жектен кейін тек қана орта салмақта жұдырықтасамын. Бұл жөнінде командаммен ақылдастым. Жоспарым міне, осындай. Бірінші орта салмақтағы чемпиондығымды қорғамаймын. Чавеске қарсы ұрысым туралы айтар болсам, екеуіміз де тәуекелге бел буып отырмыз. Ол бірнеше килоға түссе, мен қайта салмақ қосуым қажет. Бокста кейде осындай қадамдарға барып тұру керек. Бұған бола алаңдамаймын. Қайта, Хулио қобалжу керек», – деді Альварес. Кіші Чавеспен айқасы 6 мамыр күні Лас-Вегаста 164,5 фунт салмақта өтеді. Айта кетейік, орта салмақта бүгінде Геннадий Головкинге (36-0, 33 КО) жетер боксшы жоқ. Өткен жылы Альварес британиялық Амир Ханды жеңгеннен кейін көрермен болып келген қазақстандық боксшыға қарап, ашық түрде жекпе-жекке шақырған. Сондай-ақ, осы айқастан кейін сол жылдың күзінде WBA (Super), IBO және IBF белбеулерінің иегерімен жұдырықтасатынын да мәлімдеген. Бірақ арада бірнеше күн өткеннен кейін мексикалық боксшы WBC белбеуін еш қарсылықсыз GGG-ға қалдырып, өзі бірінші орта салмаққа қайта ауысқан. Қос спортшы бүгінге дейін бокс кешін ұйымдастыруда қаржы мәселесіне байланысты ортақ ымыраға келе алмай жүр.