Манчестерде гол жауған күн

Чемпиондар лигасының 1/8 финалының қалған төрт ойыны өткен аптада өтті. Бұл матчтарда «Манчестер Сити», «Атлетико», «Ювентус», «Севилья» жеңіске жет­ті. Тең ойын тіркелмеді. ● Англияда нағыз футбол драмасына куә болдық. Хосеп Гвардиола жат­тықтыратын «Манчестер Сити» өз алаңында «Монаконы» қа­былдады. Бұл ойын тарихқа плей-оффтағы ең нәтижелі кездесу ретінде енді. Матчта 8 гол соғылды. Оның бесеуі алаң иелеріне тие­сілі. Есепті 26-минутта «Сити» жартылай қор­ғаушысы Рахим Стерлинг ашты. Бірақ үзіліске дейін қонақтар алға шықты. Алдымен Радамель Фалькао таразы басын теңестірсе, екінші голды Килиан Мбаппе соқты. Екінші таймның басында Фалькао­ның есепті 3:1-ге жеткізуіне тамаша мүмкіндігі болды. Өкінішке қарай, колумбиялық шабуылшы пенальтиді дәл орындай алмады. Осыдан кейін футболдың жазылмаған «Сен соқпасаң – саған соғады» деген заңы жүзеге асты. «Манч­ес­тер Ситидің» оқтаулы мылтығы Серхио Агу­эро таб­ло­дағы көрсеткішті теңестіріп, жан­­­күй­ер­лерді са­басына түсірді. Дегенмен, Фаль­као өзінің қа­те­лі­гін жуып-шаюға тырысты. «Монако» капита­ны 61-минутта командасын матч­та екінші рет ал­ға шығарды. Бұдан кейін Гвардиола шәкірттері мінез танытып, қатарынан үш гол соқты. Сөйтіп, жеңісті жұлып алды. Алдымен Агуэро матчтағы екінші добына байғазы сұраса, сонан соң Джо­на Стоунс көзге түсті де, Лерой Зане соңғы нүк­те­ні қойды. ● Ал Германиядағы «Байер» мен «Атле­тико» кездесуінде қонақтар жеңіске жетті. Киевтің «Динамосынан» неміс командасына ауысқан австриялық қорғаушы Александр Драгович үшін «қаралы күн» болды. Қорғаушы Гриз­манн, Гамейро секілді «Атлетико» жұлдыздарынан көз жазып қала берді. Симеоненің сарбаздары алғашқы ойында төрт гол соғып, ширек финалға бір қадам жасады. Осыдан 16 жыл бұрын Мадридтің «Реалы­мен» финалда кездескен қауқарлы «Байерді» соң­ғы жылдары мүлдем байқамай жүрміз. Бұл күн­де команда финал тұрмақ, топтың өзінен әрең ғана шығып жүр. – Біз қиын ойын болатынын жақсы білдік. Бі­рақ соған қарамастан, жеңіске жету үшін ба­ры­мызды салдық. Ол қолымыздан келді. Де­ген­мен қарымта ойын да оңай болмайды. «Атле­тиконың» тарихында өз есімімді жазып қал­дырып жатқаныма көңілім толады. Әрі қарай осы қарқынымды жалғастырғым келеді. Матч бойы «Байер» футболшылары қаншама рет қыспаққа алуға тырысты. Бапкеріміздің арқасында жақсы тактика құрып, қажетті нәтижеге қол жеткіздік. Мен шабуылдағы әріптесім Гамейромен жақсы түсінісіп ойнаймын. Бүгін Торрес екеуі де гол соқты. Алдағы уақытта да осы беттерінен таймай, қуанта береді деп ойлаймын. Гамейро маған жеті пас берді. Ал мен үш рет жауап қайтардым. Екеуміз де французбыз. Сондықтан, бір-бірімізді жақсы түсінеміз, – деді «Атлетико» шабуылшысы Гризманн. ● Сәрсенбінің түнінде Буффон мен Ка­си­льяс­тың кезекті теке-тіресіне тағы куә болдық. Осы уақытқа дейін қос қақпашыны Италия мен Испания, «Ювентус» пен «Реал» кездесулерінен көретін едік. Бұл жолы олар «Порту» мен «Ювентус» ойынында жолықты. Португалияға қонаққа барған Турин командасы қарсыласынан шоқтығы биік екенін дәлелдей алды. Екінші кезеңде екі доп соққан Италия командасы да ширек финалға шығуға жақын. ● Соңғы жұп «Севилья» мен «Лестер-дің» Чемпиондар лигасындағы тәжі­рибесі аса көп емес. Әсіресе, соңғы­сы­ның. Былтыр футболда барлығын ақша шешпейтінін дәлелдеп, Англия чемпио­ны атанған Раньери шәкірттері алғаш рет Чемпиондар лигасының плей-офф сатысына жетті. Ал «Севилья» бұған дейін екі рет 1/8 финалда ойнаған. Бірақ, ширек финалға шығып көрмеген. Осы жолы үздік сегіздіктің қатарына кіруге мүмкіндігі бар. Ойын 2:1 есебімен аяқталды. Қонақ­тар Вар­дид­ың голының арқасында келесі кезеңге шығу мүм­кіндігін сақтап қалды. Егер өз алаңы­н­да же­ңіс­ке жететін болса, «Лестерді» ширек фи­налдан кө­ріп қалуымыз әбден мүмкін. Ойын нәтижелері: «Манчестер Сити» – «Монако» – 5:3 Голдар: Стерлинг, 26 (1:0). Фалькао, 32 (1:1). Мбаппе, 40 (1:2). Агуэро, 58 (2:2). Фалькао, 61 (2:3). Агуэро, 71 (3:3). Стоунс, 77 (4:3). Сане, 82 (5:3). «Байер» – «Атлетико» – 2:4 Голдар: Сауль, 17 (0:1). Гризманн, 25 (0:2). Беллараби, 48 (1:2). Гамейро, 59 (1:3). Савич, 68 (2:3). Фернандо Торрес, 86 (2:4). «Порту» – «Ювентус» – 0:2 Голдар: Пьяца, 72 (0:1). Алвес, 74 (0:2). «Севилья» – «Лестер» – 2:1 Голдар: Сарабия, 25 (1:0). Корреа, 62 (2:0).Варди, 73 (2:1). Бек ТӨЛЕУОВ, журналист АСТАНА