Үндістан Премьері ресми сапармен келеді

Кеше еліміздің сыртқы саясат ведомствосының ресми өкілі Ас­қар Абдрахманов бұқаралық ақпа­рат құралдары өкілдеріне кезекті брифинг өткізіп, аптадағы іс-шаралар барысымен таныстырды. Ресми өкілдің хабарлағанындай, Қазақстан Үкіметі Жапониядағы зілзала мен цунамиден орын алған апат салдарын қалпына келтіруге қаржылай және гуманитарлық кө­мек ретінде осы елге 1 миллион АҚШ долларын беру және 33 тонна ет консервілерін жеткізу жөнін­де шешім қабылдаған. «Қазақстан Республикасының Төтенше жағ­дай­лар министрлігінің ұшағы осы жүкпен бүгін Жапонияға аттана­ды», деді ресми өкіл. Ал 1 миллион АҚШ доллары көлеміндегі қар­жы Жапонияның Қызыл Крест қо­ға­мының есеп-шотына аударылады. Тағы бір белгілі болғаны – Тә­жікстан астанасы Душанбеде Қа­зақ­стан дипломатына шабуыл жа­салғандығы. Асқар Абдрахма­нов­­­тың Душанбедегі Қазақстан Рес­пуб­ли­касы елшілігінің мәліме­тіне сү­йе­ніп келтірген деректеріне қара­ғанда,  кеше кешкісін сағат 5.00  кезінде Душанбенің Айни кө­ше­сінің бойында елшіліктің екінші хат­шы­сы Әмір Жанаевқа шамамен 6-7 (25-30 жас аралығындағы) жергілік­ті ұлт өкілі тарапынан шабуыл жасал­ған.  Ә. Жанаевтың жанында бұл оқиға кезінде жұбайы мен 4 жасар баласы болған. Соның са­л­да­рынан елшілік қызметкері бір­қа­тар жара­қат алған. Қазіргі кезде оның ден­саулық жағдайы қалпына келуде. Ресми өкіл мынадай да мә­ліметтерді келтіре кетті. Өкі­ніштісі сол, жергілікті полиция өк­іл­дері оқиға орнына тек 20 ми­нөт­тен кейін ғана келген. Жапа шеккен қазақстандық дипломатқа кө­ше­нің бойындағы жергілікті тұр­ғындар  тарапынан ешқандай кө­мек көр­сетілмеген. Ресми өкілдің айту­ынша, ҚР елшілігі бұл жөнін­де Тәжікстанның билік орын­дарына тиісті мәлімдеме жасады. Аталған мәлімдемеде  ұлтшылдық және шо­винистік әрекеттердің ұлт­ара­лық арандатуға соқтыруы мүм­кін екеніне алаңдаушылық білдірілген.  Ал Тәжікстан билік орган­дары  бұзақыларды тез арада анық­тап, оларды ұстайтынына сенім біл­діріп отыр. Душанбенің құқық қор­ғау органдары осы мәселеге бай­ланысты қылмыстық іс қозғады. Сонымен қатар, А.Абдрахманов 15-16 сәуірде Қазақстан Президенті Нұрсұлтан Назарбаевтың шақыруымен Үндістан Премьер-Министрі Манмохан Сингхтің Астанаға ресми сапары болатынын хабарлады. Еліміз сыртқы істер министрлігінің ресми өкілі: «Жо­ғары деңгейдегі келіссөздер нә­тижесі бойынша бірлескен мә­лім­деме қабылданады деп күтілуде. Сондай-ақ, сапар аясында екі­жақ­ты экономикалық ынтымақтастық бой­ынша бірқатар келісімдерге қол қою жоспарлануда», – деді. Қа­зақ­стан тарабы алдағы сапар екі мемлекет арасындағы стартегиялық әріптестіктің дамуына елеулі үлес қосатынына, сондай-ақ сауда-эко­номикалық ынтымақтастықта бірлескен жобаларды жүзеге асыруға жаңа серпін беретініне сенім артуда. Асқар ТҰРАПБАЙҰЛЫ.