Жаңа министр тағайындалды

Кеше Мемлекет басшысы Нұрсұлтан Назарбаев Сыртқы істер министрлігінде болып, ұжымға жаңа тағайындалған Сыртқы істер министрін таныстырды. Президенттің Жарлығымен сыртқы саясат ведомствосының басшысы болып Ержан Қазы­ха­нов тағайындалды. Дипломаттарға жаңа Сыртқы істер министрін таныстыра оты­рып, Мемлекет басшысы министрлік ұжымын еліміздің сыртқы саяси жетістіктерімен, атап айт­қанда, өткен жылы ЕҚЫҰ-ға төрағалықтың және саммиттің табысты өтуімен құттықтады, сон­дай-ақ министрліктің алдын­да тұрған таяу перспективадағы басым міндеттерді атап көрсетті. Ол – маман. 1989 жылдан бері СІМ органында жұмыс істеп келеді. Он жылға жуық уақыт БҰҰ-да қызмет атқарды. Менің көмек­шім болды. Венада елші болды. Ол араб тілінің маманы. Ағыл­шын және араб тілдерін мең­гер­ген. Біз өткен жылы еуропалық мә­селелер бойынша жақсы жұ­мыс істедік. Қазір араб мәсе­ле­сімен айналысуға тура келеді. Ол ислам әлеміндегі Қазақстанның беделін нығайтуға өзінің үлесін қосады деп сенемін. Биылғы жылы үлкен істер күтіп тұр. Ма­мыр­дың бас кезінде үлкен эко­номикалық конференция, одан кейін Еуропалық қайта құру және даму банкінің форумы, ИКҰ СІМК саммиті, ШЫҰ мерейтойы өтеді. Сондықтан біз атқарар міндеттер жетерлік. ЕҚЫҰ саммитін өткізу барысындағы жұмыстары­ңыз үшін сіздерге алғысымды айтқым келеді, деді Нұрсұлтан Назарбаев қазақстандық дипло­мат­тарға. Президент елдің сыртқы саясат ведомствосының министрлік алдында тұрған барлық міндеттерді табысты іске асыратынына сенім білдірді. ----------------------------------------- Суретті түсіргендер С.БОНДАРЕНКО, Б.ОТАРБАЕВ.