Ел белсенділігі ерекше көрінді

Еліміздің саяси мәде­ниеті тағы бір сыннан абыроймен өтті. Халық Президент жариялаған Үндеуді мүд­делілікпен, білік­тілікпен талқылады. Біз осы үдерістің бел ортасында бол­дық. Елдің өскендігіне, аза­маттардың саяси қырағылығы мен заң­­на­малық сауат­ты­лы­ғына көз жет­кіздік. Сүйсіндік. Пікір­лер, ойлар кер­неуінен асып-тасып жатты. Халық – биліктің қайнар көзі деген осы! Аза­маттық қоғам, ел патриоттары Конс­титуцияның 26-бабы төңірегін­д­е босқа тер төкпеген екен. Елбасы оны біліп, қаперге алып, бұл мәселе бойынша Конститу­ция­ға өзгеріс енгізбеуді ұсынды. Ал Жұмыс тобы жетекшісі­­нің сөзіне қарағанда, Ата Заңның 63-бабын қамтитын 6 мың­дай ұсыныс түсіп­ті. Бұл, сөз жоқ, азаматтардың сая­си белсенділігінің өс­кен­дігі­нің, құқықтық сауат­­­тылығының кемел­ден­гендігінің, ел­дегі демо­кра­тияның тағ­дыры­на бей-жай қара­май­­тын­дығының айқын айғағы. Қоғам өз пікірін айт­ты. Өз миссиясын абырой­мен орын­­дады. Ендігі жауап­кершілік Пар­ламент депут­тарында. Олар халық, аза­маттық қоғам, саяси партия­лар ұсын­ған нақты ұсы­ныс­тарды заң бап­тарына ай­нал­дырып, нақтылап, елі­міз­­дің саяси жүйесіне, ең алдымен, Пар­ла­менттің өзінің қызметіне қан жүгір­тетін нормалар қабылдап, уақыт биігі­нен көріне ала ма – ендігі мәселе осында. Қазақстанның саяси жүйесін жандандырудың, оның бүкіл бойына қан жүгіртудің басты тетіктерінің бірі – Парламенттің биліктің дербес тармағы ретіндегі өкілеттіктеріне, заң шығару қызметінің сапасы мен ауқымына байланысты екендігі бүгінде даусыз ақиқат. Парламент депутаттары батылдық көрсетіп, жоба-ұсынысты толықтырып, өз билігін нығайту, әсіресе, елді бас­қарудағы атқарушы биліктің билік жүйесіндегі біржақты басым­ды­ғын еңсеру үшін өзінің халық ал­дын­дағы жауапкершілігін жаңа уақыт деңгейінен пайымдап, жасам­паздық танытып, елдегі билік тармақ­тары ара­сындағы тепе-теңдікті қалып­тас­тыруға ұмтылуы керек. Біздің тағы бір айтарымыз, депутаттар корпусы заң шығарушы билік­тің беделін көтеріп, өрісін, функция­ларын кеңейтетін нормалар қабыл­дауы керек-ақ. Мұндай мүмкіндік күн­де бола бермейді. Елбасы депутат­тарға тамаша заңнамалық тетікті өзі беріп, өзі ұсынып отыр. Қоғам енді парламентшілерден заңнамалық шығармашылық, батылдық, саяси кемелділік, демократия тағдыры үшін жанашырлық күтеді. Нәубат ҚАЛИЕВ, Л.Н. Гумилев атындағы Еуразия ұлттық университетінің профессоры, саяси ғылымдар докторы АСТАНА