20 жылдыққа – 20 инновациялық жоба

ҰСЫНЫП ОТЫРҒАН ӘЛ-ФАРАБИ АТЫНДАҒЫ ҚАЗМУ-де ҰЛЫҚ НАУРЫЗ АТАЛЫП ӨТТІ Ө.Жолдасбеков атындағы Студенттер сарайының алдындағы аумақты алаң көк­тем шуағына толып, қызылды-жасылды гүлдерге бөленгендей. Адамдардың жү­зі­нен мереке шаттығы еседі. Қалықтаған ән мен күй. Көктем бейнесіндегі сұлу қыз аққудай тербеле, мереке думан бас­тал­ғанын паш етті. Осы арада жалғасқан арнайы бағ­дар­ламада халқымыздың ұлт­тық рухы, салт-дәстүрі, өнері көрініс тап­қандай болды. Бір айтарлығы, бұл күнгі Наурызда тек қазақ әндері айтылды, бағдарлама бастан-аяқ қазақша жүргізілді. Қалыңдық іздеп жүрген аттылы жігіттердің Қыз Жібектің күймесіне мінген ҚазМУ-дың сұлу қыз­да­рына жолығып, танысу рәсімінде айна­ланы ән-күйге бөлеуі, жастардың жарасты әзіл-күлкісі ұлттық әдет-ғұрпымыздың бір қырын меңзеп көрсетті. Одан әрі күм­бір­леген күй де, қазақтың халық әндері де, Нұрғиса мен Шәмші сияқты біртуар саз­герлеріміздің әндері де, ақындар айтысы да болды. Халықаралық қатынастар факультеті жанындағы «Талейран» дипло­матиялық клубының студенттері тамаша музыкалық-би композициясын ұсынды. Аталмыш факультетте әртүрлі елдердің, соның ішінде Иранның, Ауғанстан мен Тәжікстанның жастары оқиды. Олар ғажап бейнелер, әуендер мен билер арқылы Нау­рыз мерекесінің терең тамырлы бастау­ла­ры жайында әңгімеледі. «Қара жорға» биіне ардагер ұстаздар мен жеткіншектер де араласты. Өнер көрсеткендер түгелдей университеттің өз студенттері екеніне сүй­сіндік. Тек бағдарлама түйінінде мерекенің құрметті қонағы Ескендір және Біржан Хасанғалиевтер «Атамекенді» шырқағанда барша қауым олардың әніне қосылды. Студенттер сарайының төбесіндегі биіктен Қыдыр ата Наурыздың ақ батасын берді. Мереке үстінде ректор Ғалымқайыр Мұтанов іргелі ғылыми-зерттеу орталы­ғы­на айналуға бағыт ұстаған, ел Тәуел­сіз­дігінің 20 жылдығына 20 инновациялық жоба ұсынып отырған университеттің білім беру саласындағы жарқын жетістіктерін айта келе, үздік кафедра, үздік факультет, үздік құрылымдық бөлімше және үздік жатақхана ұсынымдары бойынша жарыс жеңімпаздарын бағалы сыйлықтармен және дипломдармен марапаттады. Қорғанбек АМАНЖОЛ. ________________________________ Суреттерді түсірген Вадим МАХИН.