Дүниежүзілік бокс сериясы: Антон Пинчук жеңіспен аяқтады

Атырауда өтіп жатқан Дүниежүзілік бокс сериясында (WSB) қазақстандық «Astana Arlans» пен қытайлық «China Dragons» командалары қолғап түйістірді. Соңғы болып шаршы алаңға ауыр салмақта (91 кг) Антон Пинчук пен Қытай ұжымының атынан Сергей Новиков шықты. Бірінші раундтың басында қос боксшы бір-бірін аңдысуымен жүріп, айтарлықтай шабуылға шыға қоймаған. Бірақ бастапқы үш минуттың соңына таман Антон Пинчук алға ұмтылып, бірнеше соққысын дәл тигізе білді. Екінші раундта Сергей Новиков айтарлықтай ешнәрсе істей алмады. Бойы мен қолының ұзындығын тиімді пайдалана білмеді. Қайта отандасымыз Антон Пинчук бұрышқа тақап алып, соққылаумен болды. Келесі раундта дәл осы бағытта өрбіді. Отандасымыз джеб соққыларын дәл тигізіп жатты. Новиковтың қарсы соққыларынан жылдам қимылымен шығып кетіп жүрді. Төртінші раундта Антон сәт сайын алға ұмтылып, Сергейді бұрышқа тықсырып жүрді. Ұлты белорус спортшысына еш мүмкіндік бере қоймады. Соңғы үш минутта отандасымыз сақ қимылдап, қарсыласының шабуылына қарсы ұмтылуды мақсат етіп жүрді. Дегенмен, қарсыласының бірнеше соққысын өткізіп алған сәттер де болып жатты. Қорытындысында Антон Пинчук бокс кешін жеңіспен түйіндеді.