Астанада 50 мың текше метр қар шығарылды

Астанада су тасқыны мен төтенше жағдайлардың алдын алуға бағытталған «Көктемгі Астана» жалпықалалық сенбілігінің аясында 50 мың текше метрге жуық қар шығарылды. Бұл туралы елорда әкімдігінің баспасөз қызметі хабарлады. Қаладан барлығы 47 468 м3 қар шығарылған. Найқтырақ айтқанда, «Алматы» ауданы бойынша 22 175 м³, «Сарыарқа» ауданы бойынша 16 817 м³ және «Есіл» ауданында 8 476 м³ қар жиналған. Айта кетейік, кеше елордада су тасқыны мен төтенше жағдайлардың алдын алуға бағытталған «Көктемгі Астана» жалпықалалық сенбілігі өтті. Оның аясында қаланың барлық аудандарында тұрғын үй алаптарының, көппәтерлі тұрғын үйлердің, жекеменшік секторы мен әлеуметтік маңызды нысандардың аумағында қар жинау және оны арнайы полигондарға шығару жұмыстары жүргізілді. Ауқымды шараға қаланың барлық коммуналдық қызметтері, аудандардың өндірістік-техникалық бөлімдерінің мамандары қатысты.