Асыл перзент ардақталады

Келесі жылы көрнекті мемлекет және қоғам қайраткері Дінмұхамед Ахметұлы Қонаевтың туғанына 100 жыл толады. Қонаев қоғамдық қорының, басқа да ұйым­дар мен азаматтардың елшілікке, Мәскеу үкіметіне түскен өтініштеріне сәйкес қазір Ресей астанасында Дінмұхамед Қонаевтың есімін есте қалдырудың мүмкін болатын жолдары іздестірілуде. Мұндай ретте қала үкіметінің нормативтік құжаттарында көзделген міндетті талаптар қатаң ескерілетіндіктен, жалпы Мәскеуде тарихи тұлғаларға ескерткіш, мүсін, мемориалдық тақта, т.б. осы тәрізді естелік белгілер орнатуға қол жеткізу оңай емес, бұл көп күш-жігерді талап ететін, өзіндік қиындық-ерекшеліктері бар іс. Қазақстан елшісі Зауытбек Тұрыс­беков: «Мәскеу болат және қорытпалар инсти­ту­ты» ұлттық зерттеу техно­логия­лық университетінің ректоры Дмитрий Ливановпен кездескен кезде Дінмұхамед Қо­наев­тың мүсінін оқу орны корпустары­ның біріне орнату мәселесі келісілді. Д.Қонаев осы институттың 1936 жылғы түлегі, оның кәсіби және ғылыми қызметі аталған оқу орнымен тығыз байланысты болды. Біздің еліміз үшін де инженерлік-техникалық мамандықтар бойынша білікті кадрлар даярлауға атсалысып келе жатқан көпшілікке белгілі «Мәскеу болат және қорытпалар институты» ұлттық зерттеу технологиялық университетінің басшы­лығы Д.Қонаев мүсінін орнату бастама­сымен жалғастырып, жалпы оқу орнында Қазақстан Республикасының арнаулы мүйі­сін ұйымдастыру мәселесін ұсынуда. Атап айтқанда, мұнда институт пен Қазақ­стан арасындағы қарым-қатынастың білім, ғылым және металлургиядағы озық тәжірибені енгізу салаларындағы бай тарихы, тәуелсіз мемлекетіміздің жан-жақты жетістіктері, өзара ынты­мақ­тас­тықтың перспективалы бағыттары көрсетілетін болады. Елімізге арналған болашақ компози­ция­да Қазақстан Республикасының Тұң­ғыш Президенті – Елбасымыз, «Мәскеу болат және қорытпалар институты» ұлттық зерттеу технологиялық универ­си­тетінің құрметті профессоры Н.Ә.Назарбаев жайында, оның тәуелсіз Қазақстанды қа­лып­тастырып, дамыту жолындағы тарихи рөлі туралы ақпараттар ор­на­лас­тырылады деп жобалануда», дейді. Сонымен бірге, технологиялық университет басшылығы, Қазақстан тарапы­нан қаржылық тұрғыда қолдау жасалса, Д.Қонаевтың қола мүсінін әзірлеуге оқу орны кафедраларының кәсіби-шығарма­шы­лық мүмкіндіктерін пайдалануға да болатынын айтады. Серікқали БАЙМЕНШЕ. Мәскеу.