Ерлігімен ерекшеленгендерге – «Ел қорғаны» медалі

Ақордада Мемлекеттік хатшы Гүлшара Әбдіқа­лықованың төрайымдығымен Мемлекеттік рәміздер мен ведомстволық және оларға теңестірілген өзге де наградалар геральдикасы мәселелері жөніндегі мемлекеттік комиссияның отырысы өтті. Комиссия басқосуында Мәдениет және спорт мин­истр­лігінің жауапты хат­шысы Қ.Уәлиевтің Қазақ­­стан Республикасы Мемле­кеттік рәміздерінің 25 жыл­дығын атап өту бойын­ша жоспарланған іс-ша­ра­ларға қатысты ақпа­раты тыңдалды. Мем­лекеттік хатшы: – Өздеріңізге белгілі, биылғы жылы мемлекеттік рәміздеріміз – Мемлекеттік ту мен Елтаңбамыздың қабылданғанына 25 жыл толады. Бұл – елдікті және егемендікті айқындайтын атаулы дата. Сондықтан осы мерекелер аясында Астана, Алматы қалалары арнайы іс-шаралар өткізуге тиіс. Мемлекеттік рәміздердің 25 жылдығын мерекелеудегі басты мақсат – Мәңгілік Ел мұраттарын, қазақстандық патриотизмді насихаттау, өскелең ұрпақты Тәуел­сіздікті қорғауға, бағалауға тәрбиелеу, – деді. Сонымен қатар, комиссия мүшелері Қорғаныс министрлігі бекітуге тиісті «Ел қорғаны» ведом­ство­лық наградасын бекіту туралы ұсынысты қарады. Қор­ғаныс министрі Сәкен Жасұзақовтың айтуынша, бұл награда ерлігімен, еңбегімен ерекшеленген әскерилерге берілуге тиіс. – Біз бұл медальды ерлі­гімен, еңбегімен ерекшеленген әскерилерді – генералдар құрамын, офи­церлерді, сержанттар мен солдаттарды марапаттауды жоспарлап отырмыз. Сонымен қатар, қорғаныс күштерінің әлеуетін кү­шейтуге сүбелі үлес қосқан басқа да азаматтар марапат­талады. Меніңше, қатар­дағы жауынгерлерден бас­тап, генералдарға дейін әс­­ке­­ри қызметте көзге түс­ке­­ні үшін өзіміздің төл ве­домстволық медальды ие­лен­­гені дұрыс болады, – деді генерал-полковник С.Жас­­­ұзақов. Мемлекет басшысы «Ел қорғаны» медалін та­ғайын­дау туралы ұсыныс­қа қол­дау білдірген. Жаңа наг­рада биылғы жылы ата­лып өтілетін қорғаныс күш­терінің 25 жылдығы қар­саңында тапсырылады деп жоспарланып отыр. Арнұр АСҚАР, «Егемен Қазақстан»