Ата Заңға өзгерістер енгізу арқылы жүзеге асырылатын саяси реформалардың басты баптарымен танысу мақсатында облыстық, аудандық қоғамдық келісім кеңестері, облыстық ҚХА ғылыми-сарапшылық тобының мүшелері, этномәдени бірлестіктер өкілдері Достық үйіне жиналды.
«Мемлекетіміздің басты құндылықтарының бірі – ұлтаралық келісім. Ортақ мүдде жолында бірлесе қызмет етуді Атыраудағы өзге ұлт өкілдері де қуаттайды. Бірлігі мен берекесі жарасқан еліміздің жаңа белестерді бағындыруына қабылданған конституциялық реформа оң ықпал етеді деп сенеміз», – деді облыстық Қазақстан халқы Ассамблеясы хатшылығының басшысы Гүлмира Шәкірова.
Мәжілісте тарих ғылымдарының кандидаты, профессор Болат Нығыметов, Атырау облысы Қазақстан халқы Ассамблеясы ғылыми-сарапшылық тобының мүшесі, тарих ғылымдарының докторы Кәрім Өтелбаев конституциялық реформаның мемлекеттілікті дамытудың жаңа кезеңі екені жайында сөз сөйледі.
Облыстық ҚХА Қоғамдық келісім кеңесінің төрағасы Дүйсенбек Құлжанов, «Новруз» әзербайжан этномәдени бірлестігінің төрағасы Эльдар Ахмедов, «Былина» орыс этномәдени бірлестігі төрағасының орынбасары Райса Биткова өздерінің сөздерінде аталған реформаны жүзеге асыру жалпыхалықтық іс екеніне тоқталды.
Қоғамдық келісім және достық үйінде қазір 17 этномәдени бірлестік жұмыс істейді. Ал жақында барлық аудандардағы әкімдіктер жанынан Ассамблея саясатын жүргізуге, Қоғамдық келісім, аналар мен жастар кеңестерінің жұмыстарын ұйымдастыруға арнайы штат ашылды.
Бақытгүл БАБАШ,
«Егемен Қазақстан»
АТЫРАУ