Сенат судьяларды қызметінен босатты

Парламент Сенатының кешегі түстен кейінгі өткізілген жалпы отырысында Қаржы полициясы агенттігінің ел Президенті атына жасаған ұсынысы бойынша Жоғарғы Соттың  кейбір судьяларының мәселесі қаралды. Сенат депутаттары  алдында Мемлекет басшысының өкілеттігі бойынша Президент Әкімшілігінің Басшысы Аслан Мусин сөз сөйледі. «Мемлекет басшысының тап­сыр­­масына сәйкес, мынаны ха­бар­лауға рұқсат етіңіздер. Қаржы полициясы агенттігі Қазақстан Президентінің атына бірқатар су­дьяларды Жоғарғы Соттың судья­сы қызметінен босату туралы ұсыныс жасады. Олар Алмаз Тә­шенова, Мақсат Әбілқайыр, Мәр­зия Балтабай, Сайлаубек Жә­кі­шев, Бақытжан Жақыпов, Марк­лен Қамназаров», – деді Аслан Есболайұлы өз сөзінде. Содан кейін Экономикалық қыл­мысқа және сыбайлас жем­қор­лыққа қарсы күрес агент­ті­гі­нің (Қаржы полициясы) төрағасы Қайрат Қожамжаров Жоғарғы Соттың бірқатар судьяларына қа­тысты олардың сыбайлас жем­қор­лық қылмысқа барғандығы ту­ралы фактілерді жария етті. Агенттік төрағасы өз ведом­ство­сының заң ережелері шеңберінде Бас прокурор санкциясын ала оты­рып, Жоғарғы Соттың кейбір лауа­зымды тұлғаларына қатысты  ар­найы жедел шараларды жүзеге асыр­ғандығын ерекше атап өтті. Нә­тижесінде Жоғарғы Соттың Аза­маттық және әкімшілік істер жө­ніндегі қадағалау алқасының төр­айымы Алмаз Тәшенова мен Жо­ғар­ғы Сот судьясы Сайлаубек Жә­кі­шевтің әрекеттерінен сыбай­лас жем­қорлық фактілері анықталыпты. Аталған лауазым иелері өз­де­рінің қызмет бабын пайда­ла­нып, «Фикален» АҚ мүддесі үшін мемлекет қоржынына 212 миллион теңге шығын келетіндей шешім шығарып, заңсыз сый­ақы­лар алған.  Бас прокуратура тара­пы­нан  судьялар үстінен  қыл­мыс­тық іс қозғалғаны белгілі болып отыр. Сондай-ақ Жоғарғы Сот су­дья­лары Бақытжан Жақыпов, Мәр­зия Балтабай, Мақсат Әбіл­қайыр және Марклен Қамназаров әрекеттерінде сыбайлас жемқор­лық  анықталғаны жария етілді. Аты аталған судьялар бірнеше рет азаматтардың құқықтарын бұза отырып, жеке тұлғалардың пайдасы үшін шешім шығарған. Сот процесіне қатысушылармен және олардың өкілдерімен процессуалдан тыс байланыстарға барғандығы, тергеу органдары­ның жұмысына кедергі келтіргендігі және жалған кәсіпкерліктің мүддесі үшін азаматтық істер бой­ынша сот шешімін шығар­ған­дығы анықталыпты. Жоғарғы Сот­тың Қылмыстық істер жө­нін­дегі сот қадағалау алқасы хат­шы­сының орынбасары Т.Сәрсеновке қатысты қылмыстық іс қозғал­ған­дығы да белгілі болды. Хат­шының орынбасары «Газ-Си­не­горье» ЖШС басшысынан сот­тың оңтайлы шешім шығаруы үшін 150 мың АҚШ долларындай пара талап еткен. Қазіргі таңда Т.Сәрсеновке айып тағылып, ол қамауға алынған. Нәтижесінде Жоғарғы Соттың кейбір судьяларын қылмыстық және құқық бұзушылық қадам­дарға барғаны үшін қызметінен босату, өкілеттіктерінен айыру туралы Мемлекет басшысының ұсынысын  Сенат қолдады. Нәтижесінде жоғарыда аты аталған судьялар қызметінен босатылды. Асқар ТҰРАПБАЙҰЛЫ.