Тұрақтылық тірегі – татулық

Біз – қазақстандықтармыз! ЕРЛІКТІҢ ЕРЕНІ – ЕЛДІКТІҢ ЕРЛІГІ 3 сәуір күні Қазақстан халқы сондай ерлік танытты. Елдік ерлігі алдымен сайлау­шы­лардың 90 пайыздан астамының дауыс беруге келуінен көрінді, одан кейін сонша сайлаушының 95 пайыздан астамының бір адамға – тәуелсіз Қазақстан мемлекетін құ­рушы, Ұлт көшбасшысы, Елбасы Нұрсұлтан Назарбаевқа дауыс беруінен көрінді. Бүгінгі таңда әлем саясаттанушылары Нұрсұлтан Назарбаевтың сайлаудағы жар­қын жеңісінің феномендік сипатын талдап, таразылап жатыр. Қатпары қалың осынау қазақстандық құбылыстың себептері көп. Солардың арасындағы ең бастысы – егемендіктің елең-алаңынан бері елімізде дәйім қоғамдық тұрақтылық сақталып келе жатқандығы. Ал тұрақтылықтың басты тетігі – татулық. «Бірлік – біздің қасиетті туымыз», деген болатын Президент тәуел­сіздік туын жаңа тіккен тұста-ақ. «Қазақ­стан­дағы ұлтаралық жарастықтың негізгі ұйыт­қысы болу міндетін алдымен осы ата­ме­кеннің иесі – қазақ халқы өз мойнына алуы керек», дегенді де сол кезде айтып, міндеттеген. Халқымыз ол міндеттің үде­сінен шыға білді. Тарих тоғыстырып, тағдыр табыстырған сан этностың басын біріктіріп, туыстық туын қолда берік ұстай білді. Елімізді мекен еткен алуан этностар өкілдері де мемлекетті аяғынан тік тұрғы­зып, елді еңселенткен, бара-бара әлемге әй­гілі еткен Көшбасшымыздың төңірегіне топ­та­сып, азаматтың алтын басын ардақтай алды. Елбасымыздың: «Бірлігі берекелі, тірлігі мерекелі, ынтымағы жарасқан елдің ғана ырысы мен табысы мол болмақ», деген сөз­дерін татулықтың туы етіп ұстады.  Өйткені, біздің бәріміздің мүддеміз бір. Президент бұл жайында да: «Адам мен адамды, халық пен халықты, ел мен елді жақындастырар ең берік дәнекер – мүдде бірлігі», деп айшықты айтқан.  Біздің  мүддеміз – ортақ Отанымыз – тәуелсіз Қазақстанның өсуі, өркендеуі, барша қазақстандықтардың баянды бақыты. Қазақстан халқы Ассамблеясының дүй­сен­бі күні ашылатын XVII сессиясы қар­са­ңында жарияланып отырған мына фотолар – біздің еліміздегі қоғамдық жарасым мен этносаралық келісімнің келісті көріністері.