Міндеттер нақтыланып, межелер белгіленді

Кеше Премьер-Министр Кәрім Мәсімовтің төрағалығымен Үкіметтің кезекті отырысы болып өтті. – Жексенбіде өткен кеңей­тіл­ген мәжілісте Мемлекет басшысы Нұрсұлтан Назарбаев Үкіметтің алдына бірқатар келелі міндеттер қойғанын білесіздер. Бүгін мен сол Елбасы жүктеген міндет­тер­дің орындалу барысын және оған кім жауапты екендігін нақтылап алғым келіп тұр, – деді Үкімет басшысы. Елбасы өз сөзінде таяу бес­жыл­дықта Қазақстан табысы ең жоғары деңгейдегі елдер тобына енуі қажет, 2016 жылға қарай ІЖӨ деңгейі жан басына шаққан­да кемінде 15 мың долларға жетуі тиіс деп атап көрсетті. Осыған байл­анысты Премьер-Министр Эко­номикалық даму және сауда министрі Қайрат Келімбетовке екі апта уақыт ішінде әрбір сала үшін экономикалық өсім деңгейін белгілеуді және экономиканың әрбір саласына жауапты министрліктер мен әкімдіктерді анықтауды тап­сыр­ды. «Мемлекет басшысы айт­қан межелерге жету үшін эко­но­микамыз жыл сайын кемінде 7 пайыздық өсім көрсетуі керек. Біз экономикалық көрсеткіштердің өсу дәрежесін тоқсан сайын тексеріп отыратын боламыз, соған байланысты сіз экономиканың әр­бір саласын өңірлер бойынша және ведомстволар мен министрліктер бойынша қандай жауапкершілік жүктелетіндігін жеке-жеке саралап көрсетуіңіз керек», – деді Кәрім Мәсімов. Отырыста Үкімет басшысы Индустрия және жаңа техноло­гия­лар министрлігіне осы айдың со­ңына дейін Индустрияландыру картасын нақтылауды жүктеді. Оның ішінде жаңа инвести­ция­лық жобаларды іс жүзіне асыруға, биылғы жылы іске қосылатын 192 жобаның орындалуына ба­рын­­ша жауапкершілікпен қарау тапсы­рылды. Мемлекет басшысы­ның тікелей тапсыр­ма­сына байла­ныс­ты елімізде ұлттық геоло­гия­лық барлау компаниясы құрылады. Осы­ған орай Премьер-Министр Индустрия және жаңа технологиялар министрі Әсет Исе­кешевке және «Самұрық-Қа­зына» ҰӘҚ бас­шысы Тимур Құ­лы­баевқа бір апта уақыт ішінде осы ұлттық ком­па­нияны құру жә­не оны қаржы­лан­дыру тура­лы на­қты ұсыныстар дайын­дауды тап­сырды. Сонымен бірге Премьер-Министр Кәрім Мәсімов Сыртқы істер және Индустрия және жаңа технологиялар министрліктеріне елімізге жаңа инвесторлар тарту жоспарын белгілеп, нақты шаралар ұйымдастыруды тапсырды. Елбасы Нұрсұлтан Назарбаев 17 сәуірде сөйлеген сөзінде еліміздің азық-түлік қауіпсіздігін қамтама­сыз етуге, аграрлық секторды да­мытуға, бәсекелестікті қорғауға жә­не жер ресурстарын тиімді пай­далануға айрықша мән беріп, бір­қа­тар келелі міндеттер қойды. Үкі­мет отырысында Премьер-Ми­нистрдің бірінші орынбасары Өмірзақ Шөкеевке Жер ресурс­тарын басқару агенттігімен және облыс әкімдерімен бірлесе оты­рып, еліміздегі барлық ауыл­ша­руа­шылық маңызы бар жер телімдеріне ревизия жасау міндеті жүк­телді. Сонымен бірге оты­рыста елімізде әлеуметтік маңызы бар тауарлардың бағасын тұрақтан­дыру мәселесі бойынша нақты шаралар белгіленді. Экономикалық даму және сауда министрлігіне Мемлекеттік қызмет істері жөніндегі агенттікпен және өңірлердің әкімдерімен бірлесе отырып, жергілікті өзін-өзі басқару өкілеттігін кеңейту мақсатында бірқатар мемлекеттік өкілеттіктерді жергілікті жерлерге беру мақсатында кешенді шаралар белгілеу міндеті жүктелді. «Мемлекет басшысы үстіміздегі жылдың 13 мамырында Алматы­дағы Ақпараттық технологиялар паркінің арқауында инновацияны дамытуға арналған кеңейтілген мәжіліс өткізетін болады. Осыған байланысты 10 мамырға дейін Премьер-Министрдің орынба­са­ры – Индустрия және жаңа технологиялар министрі Әсет Исекешев нақты бағдарламалар дайын­дап, ұсыныс енгізуі керек», деді Үкімет басшысы. Премьер-Министр бір ай мерзім ішінде Білім және ғылым министрлігіне тиісті әкімдіктермен бірлесе отырып, Астана, Алматы, Ақтөбе және Шымкент қала­ла­рында әлемдік деңгейдегі кәсіп­тік-техникалық колледждер ұйым­дас­тыру жөнінде нақты шаралар дайын­дауды тапсырды. «Бола­шақ» бағдарламасына байланыс­ты қор­да­ланған мәселелерді ше­шу­дің жол­дарын белгілеу үшін де министрлікке бір ай уақыт берілді. Үкімет отырысында халыққа қызмет көрсету орталықтарының (ХҚО) жұмысын жандандыру мә­се­лесі де жан-жақты тілге тиек етіл­ді. Байланыс және ақпарат ми­нистрлігіне 30 маусымға дейін ХҚО-лардың жұмысын жақсарту және олардың тұрғындарға көр­се­тетін қызметтерінің сапасын кө­те­ру мақсатында нақты шаралар белгілеу тапсырылды. Сонымен бі­рге аталмыш министрлік «Қа­зақ­телеком» АҚ-пен бірлесе оты­рып, екі апта уақыт ішінде тұрғын­дар­дың жоғары сапалы Интернет жү­йесіне қосылу мүмкіндігін кеңей­ту және елімізде 4G стандартын енгізу жөніндегі нақты жоспарын әзірлеуі керек. Көлік және коммуникация министрлігіне «Эйр Астана» ұлттық әуе компаниясымен бірлесе оты­рып, жеті сағат ұшу қашық­ты­ғын­дағы әлемдегі барлық ірі қа­ла­лармен тікелей әуе байланысын ашу міндеті жүктелді. Сонымен бірге Үкімет басшысы осы министрлікке «Самұрық-Қазына» ҰӘҚ» және «Қазақстан темір жолы» АҚ-тармен бірлесе отырып, еліміздің аумағы бойынша жүк тасымалы­ның жүйелі кестесі көрсетілген транзиттік көлік әлеуетін арт­тыру­дың нақты жоспарын жасау міндетін жүктеді. Сондай-ақ Үкі­мет отырысында тиісті органдар мен барлық әкімдіктерге биылғы жылу маусымының қорытынд­ы­сын саралап, алдағы жылу мау­сымына дайындықты жандан­ды­ру мәселесі тапсырылды. Үкімет басшысы тиісті министрліктер мен ведомстволарға жұмысшы­лардың еңбекақысын мезгілінде төлеу қажеттігін ерекше еске салды. Еңбек және халықты әлеу­меттік қорғау министрлігі Бас прокуратурамен бірлесе отырып, осы мәселе бойынша жан-жақты мониторинг жүргізіп, кінәлілерді анықтауы қажет. Үкімет отыры­сында Премьер-Министр Кәрім Мәсімов Ауыл шаруашылығы министрлігіне, өңірлердің әкімдері­не көктемгі егіс жұмыстарын барын­ша ұйымшылдықпен өт­кізу­ді тап­сырды. Күн тәртібіндегі осы келелі міндетке байланысты 20 сәуір күні Үкіметте арнайы селекторлық кеңес өткізілетін болды. Жылқыбай ЖАҒЫПАРҰЛЫ.