1997 жылы атыраулық күй қағаны Рысбай Ғабдиевтің шақыруымен Дина Нүрпейісова атындағы академиялық қазақ халық ұлт аспаптар оркестріне әнші болып келді. Содан бері Жайықтың о жағы мен бұ жағынан ғана әуелеп ән оздырмай, шет ел сахналарында да тыңдармандарын таң қалдырып жүр. Қазір оның репертуарында батыс өңірдегі барлық әншілік мектептің 250-ден астам әні бар. Одан бөлек, дәстүрлі өнермен болашақтарын байланыстырған жастардың тәлімгері, ұстазы.
Міне, осындай дарабоз дарынның өнерін бағалап, насихаттау мақсатында Атырау облысы әкімдігінің қолдауымен шығармашылық кеш өтті. Оған Қайрат Кәкімовтің өнердегі сыйлас дос-жолдастары еліміздің түкпір-түкпірінен келіп, Жайық жағасын жауһар жырға бөледі. Кезінде мемлекет және қоғам қайраткері, халық жазушысы Әбіш Кекілбаев Қайратқа «Халық аузында сақталған сирек әндерді іріктеп, өз дауысыңмен күйтабаққа жаздыр. Бұл – болашақ ұрпаққа қалар баға жетпес қазына», деп айтқан екен. Сол аманат орындалып, Қайрат Кәкімов 132 ән енгізілген жеке альбомын шығарды. Өнер кешінде оның тұсауын Қазақстан және Қырғызстан Республикаларының еңбек сіңірген қайраткері Илья Жақанов кесіп, батасын берді.
Қайрат Кәкімовтің шығармашылық кешінен басталған өнер мерекесі «Ән дария дүлдүлдері» І республикалық дәстүрлі әншілер байқауымен жалғасты.
Бақытгүл БАБАШ,
«Егемен Қазақстан»
АТЫРАУ
