1963 жылы ашылған осы университетте әр саладағы таңдаулы мамандар ұлтымыздың фольклорлық мұраларынан бастап сол замандағы аса ірі тұлғаларға дейінгі аралықтағы бүкіл әдеби, мәдени, ғылыми шығармашылықты қамтитын 500-ден аса лекция оқыпты.
Осы университеттің қолға алуымен 70-жылдарға дейін өз өлкесінен әріге таныла қоймаған Сыр бойының жыраулық дәстүрі бүкіл елімізге мәлім болып, кең тараған. Осы университеттің бастауымен айтыс өнері жанданған. Жыршылық, термешілік өнердің, шертпе күйдің бағы жануына, халық композиторларының республика көлемінде танылуына зор еңбек еткен университеттің басында академик Рахманқұл Бердібай тұрды.
Бір ғана мысал, кеңес заманында екеуара айтыстың қандай түрінде де оқу орындарының, басқа да кішігірім сахналарға шыққан жұптардың қағазға қарап айтысқанын көзі көрген адамдар әлі бар арамызда. Егер айтыскерлер бүгінде қолма-қол жанынан суырып шығарып айтып жүрсе, бұл жанрдың жайқалғанын, дамығанын көрсетеді. «Бір өлеңі бір елдің мұрасындай» демекші, бір ғана қоғамдық қызметінің өзінде халқына өлшеусіз еңбек еткен Рахманқұл Бердібай сияқты академиктердің ғылыми мұрасы туралы айту, жазу үшін таңды таңға ұру керек екенін өзіңіз де пайымдай беріңіз. Бірақ, олардың ғылыми мұрасын да, мәдениетімізге сіңірген өлшеусіз еңбегін де насихаттау, кейінгі жастардың санасына құю парыз болып қала бермек.
Осы орайда Л.Н.Гумилев атындағы Еуразия ұлттық университеті М.Жұмабаев атындағы әдеби бірлестіктің «Алқа» клубы ұйымдастырған «Толағай толқын тағылымы» атты ғылыми семинардың студент-жастарға берген әсері мол болды. Толағай толқын дегеніңіз осы – Рахманқұл Бердібай, Қажым Жұмалиев, Мүсілім Базарбаев, Зейнолла Қабдолов, Серік Қирабаев, Нығмет Ғабдуллин сынды академиктер мен профессорлардың тізімі болып жалғаса береді. Және бұлардың барлығы биыл тоқсан жасқа шығып отыр. Олардың халқымыздың әдебиетіне, мәдениетіне сіңірген өлшеусіз еңбектері жайында университеттің профессорлары кеңінен толғады.
Айгүл СЕЙІЛОВА,
«Егемен Қазақстан»
