Мұндай жиынның өтуінің өзіндік себебі бар. Соңғы кезде интернет желілері арқылы балалардың өз-өзіне қол салуын мәжбүрлейтін сайттар әшкере бола бастады. Оның үстіне, бала психологиясына теріс әсер ететін ойындар қаптады. Осындай келеңсіздіктердің алдын алу үшін Астанадағы «Келешек» психикалық орталығының мамандары Ақгүл Молдабекова мен Сергей Советкин ата-аналарға интернеттің теріс ықпалын, ойындар мен әлеуметтік желілердің кері әсерін түсіндірді. Бұл ретте облыстық білім басқармасының басшысы Балым Ізбасарова технологияның дамыған ғасырында баланы теріс ақпараттардан қорғау қиындай түскеніне назар аударды. «Бүгінде әлеуметтік желілерде «Синий кит», «Тихий дом», «Беги или умри» сияқты өзіне қол жұмсауға алып келетін заңсыз ойындар қаптап кеткен.
Күш көрсету мен өз-өзіне қол салуға алып келетін қауіпті ойындар алдымен Ресейде таралып, артынан Қырғызстанда жалғасын тапты. Ал біздің өңірде бес баланың аталған ойындарға қатысқаны анықталды. Балалардың өз-өзіне қол салуының алдын алу мақсатында ата-аналарды балаларының жүріс-тұрысын қадағалауға шақырамыз. Проблемадан теріс айналуға немесе елемеуге болмайды. Сондықтан балаларымызға көңіл бөлейік», деді Б.Ізбасарова.
Ал психолог Ақгүл Молдабекованың айтуынша, егер жеткіншек өз ісіне берілген болса және оның қызығушылығын қолдайтын достары бар болса, онда ол бала өз алдына мақсаттар мен міндеттер қоя алады. Алайда, алдымен ата-ана балаларына жақсы үлгі көрсете білуі тиіс. Бұл ретте білім басқармасы өңірдегі ата-аналар қауымдастығын қажетті ақпаратпен толық қамтуды көздеп отыр. Осы іспетті түсіндіру шаралары Зеренді, Жақсы және Целиноград аудандарында да өткізілді.
Асқар ТҰРАПБАЙҰЛЫ, «Егемен Қазақстан»
Ақмола облысы
