Қызылжар өңірінде коммуналдық төлемдер бойынша қарызға белшеден батқан тұрғындар жыртылып-айырылады. Қазір олардың берешегі 400 миллион теңгені құрап, сот органдарына 452 талап-арыз жолданған.
«Севказэнергосбыт» ЖШС-нің басқарма басшысы Рүстем Рамазановтың айтуынша, берешек төлемдер үшін жыл басынан бері екі мыңға жуық пәтер электр қуатынан ағытылған. Бірақ, дүние-мүлкін тәркілеу, шет елге шығуға тыйым салу секілді қолданылған шараларға қарамастан, коммуналдық қарыздардың кемитін түрі байқалмайды. Міндетті төлемнен жалтарып, неше түрлі қулықтарға баратындар бірнеше мәрте әшкереленген. Олардың арасында электр қуатын заңсыз қосып алғандар жиі кездесетін көрінеді. Петропавл қаласының бір тұрғыны он жылдан бері есеп айырыспай келген. 7 адамның қарызы жарты миллион теңгеден асқан.
Енді сот орындаушылар коммуналдық қызмет көрсететін кәсіпорындармен бірлесе қимылдап, тығырықтан шығудың қатаң жолдарын қарастыруға көшкен. Заң аясында ықпал жасау өз нәтижесін біртіндеп бере бастаған сияқты. Мәселен, сот шешімімен бір тұрғынның дүние-мүлкі тәркілене бастағаны сол екен, 450 мың теңге қарызын қолма-қол құйған. «Тәркіленген дүние-мүліктерді сату – ұзаққа созылатын процесс. Қарызгерлерді табу да оңайға соқпайды. Былтыр − 10, биыл 3 көлік алынды. Араларында қымбат «темір тұлпарлар» да бар. Соған қарағанда, иелері бақуатты тұратын секілді. Не себепті уақтылы есеп айырыспайтыны түсініксіз», дейді жеке сот орындаушы Мақсат Бисекеев. Берешектерін өтеуіне байланысты өндіріске жіберілген 917 істің төрттен бірі қысқартылған.
Бүгінде 3 тұрғынның пәтерлерінен айырылатыны белгілі болып отыр. Олардың кебін тағы 4 тұрғын киюі мүмкін.
Өмір ЕСҚАЛИ, «Егемен Қазақстан»
Солтүстік Қазақстан облысы
