Орал қаласында өткен алғашқы тазалық жұмыстарына 4253 қала тұрғыны қатысыпты. Әртүрлі меншіктегі 102 мекеме-ұжым қатысқан тазалық шараларының нәтижесінде шаһар көшелері, Орал-Саратов автожолының бойы, Деркүл, Бортау ауылдарындағы айналма жолдар маңайы тазартылған.
− Тазалық айлығын жариялап, сенбілік өткізу – біздің жыл сайынғы дағдымыз. Өткен жылы сәуір, мамыр, тамыз, қыркүйек және қазан айларында сегіз мәрте сенбілік ұйымдастырылды. Оған жерлестеріміз белсенді қатысады. Былтыр Оңтүстік, Алмазов, Некрасов, Мөңкеұлы көшелері мен Зашаған ауылында, Еуразия даңғылында 6746 түп, ал Еуразия көшесі мен Тәуелсіздік көшесінен Жұлдыз шағын ауданына дейін 500 түп түрлі көшет отырғызылды. Биыл да осы істі жалғастырамыз. Тауық жылы Орал қаласында 17 ауланы абаттандыруға 500 млн теңге, екі тынымбақты жөндеуге және абаттандыруға 160 млн теңге қаражат бөлініп отыр, − дейді Орал қалалық тұрғын-үй коммуналдық шаруашылық, жолаушылар тасымалы және автомобиль жолдары бөлімінің абаттандыру секторының меңгерушісі Мирас Мүлқай.
Қазбек ҚҰТТЫМҰРАТҰЛЫ,
«Егемен Қазақстан»
ОРАЛ
