Батыс Қазақстан облысы тұтынушылардың құқықтарын қорғау департаменті қызметкерлері соңғы кезде сауда орындарына қарапайым тұтынушы ретінде барып, сауда жасап, сатып алған тауарларды зертханадан өткізуді әдетке айналдырған.
– Былтыр департамент тарапынан тексерулер 2015 жылмен салыстырғанда 2,5 есеге азайды. Қазіргі тәртіп бойынша сауда орнын жылына бір-ақ рет тексере аламыз, оның өзінде 1 ай бұрын ескертуге тиіспіз, – дейді облыстық тұтынушылардың құқықтарын қорғау департаментінің басшысы Жайдар Құрманов.
Әрине, мемлекет тарапынан көрсетіліп отырған қолдауды теріс пайдаланып, қарапайым тұтынушының құқығын ескермей кететін «кәсіпкерлер» де табылады. Бірақ, оларды да әшкерелеудің жолы табылған. Батысқазақстандық санитарлар облыс аумағындағы елді мекендердің халық көп баратын сауда орындарынан халықтың басым бөлігі тұтынатын тауар өнімдерін арнайы сатып алады. Бұл үшін мемлекеттен арнайы қаржы бөлінген. Осы тауарлар департаменттің түрлі зертханаларында сараптамадан өткізіліп, қалыпқа сай келмейтін, заң бұзушылық фактілері болса, кінәлілер жауапқа тартылады.
Мәселен, 2016 жылы 2430 өнім санитарлық-эпидемиологиялық сараптама жүргізу үшін сатып алынып, зертханадан өткізілді. Оның 70 пайыздан астамы тамақ өнімдері. Тексерілген тауардың ішінде 619 өнімнен (25,4%) түрлі дәрежедегі сәйкессіздік анықталған. Мысалы, кейбір тауардың жазуы мазмұнына сай емес, кейбірінің микробиологиялық құрамында ауытқушылық табылған. Тексерулер нәтижесінде қызметінен кемшілік табылған кәсіпкерлерге 192 ұйғарым берілді. 24 оқиға бойынша айыппұл салынған. Айыппұлдың жалпы сомасы – 5 514 600 теңге.
Қазбек ҚҰТТЫМҰРАТҰЛЫ,
«Егемен Қазақстан»
ОРАЛ
