– Бұл мәселе кәсіпкерлер үшін өте өзекті, коммерциялық банктердің де мүддесін қозғайтыны рас. Сондықтан, өңірлік карта көрсетілген жобаларды қаржыландыруды ұтымды ұйымдастыру қажет. Облыс басшылығымен біз өңірдің инвестициялық мүмкіндігін қарадық. Күшті шашыратпай, қаржыны қайда шоғырландыру қажеттігін түсінуіміз қажет. Ең алдымен, ауылшаруашылық өнімін өңдеу мәселесі адыңғы орында болуы тиіс. Әбден анықталған жобалар тізімін «Атамекен» арқылы Үкіметке және шетелдік инвесторлар назарына ұсынамыз, – деді Тимур Құлыбаев.
Ұлттық палата төралқасының төрағасы қазір министрліктер деңгейінде салық заңдылығын жеңілдету туралы мәселе қаралып жатқандығынан хабардар етті. Бүгінде палатаға жүгінген әр төртінші кәсіпкер салық туралы сөз қозғайды екен.
Басқосуда ауыл шаруашылығындағы қиындықтар да айтылды. Кәсіпкерлердің өңірлік палатасының директоры Мұрат Әбенов ауыл шаруашылығындағы кәсіпкерлердің несие алуға кепілдерінің банкке өтімсіздігін айтты. Өңірде жеңілдікпен шағын қаржыландыратын ұйымдар құру қолдау тапты. Қостанай облысында тұрғындар 8 айдың ішінде «Атамекен-Қостанай» шағын қаржыландыру ұйымы арқылы 344 миллион теңгеге 93 займ алған. Ол мал шаруашылығында, қоғамдық тамақтандыруда, жүк тасымалында жаңа жобалардың ашылуына мүмкіндік берген.
Тимур Құлыбаев бастаған топ Кәсіпкерлерге қызмет көрсету орталығында, «Баян сұлу» кондитер фабрикасында болды.
Нәзира ЖӘРІМБЕТОВА,
«Егемен Қазақстан»
ҚОСТАНАЙ
