Отырыстың ашылуында «Атамекен» ұлттық кәсіпкерлер палатасы басқармасының төрағасы Абылай Мырзахметов сөз сөйлеп, түркі елдерінің сауда-экономикалық байланыстарын жақсартуды көздейтін жаңашылдықтар, саладағы кедергілерді төмендетуге және жүктерді жедел өткізуге бағытталған кедендік ресімдеудегі өзгерістер жайында айтып берді. «Біз шарамызды қазақстандық-түркиялық бірлескен сауда-өнеркәсіп палатасын құру туралы меморандумға қол қоюмен бастадық. Оған әріптестеріміздің де қосылатындығына сенімдімін. Әзербайжан мен Қырғызстандағы әріптестеріміз қосылса, біз бірлесе жұмыс істейтін бірыңғай платформа жасар едік», деді А.Мырзахметов.
«Атамекен» ҰКП басқармасының төрағасы палатаның қатысуымен барлық өңірде кедендік ресімдеу аймағы құрылатындығын жеткізді. «Бұл туралы шешім қабылданды. Премьер-Министр Бақытжан Сағынтаев облыстарға ұсыныс жасауда. Кедендік ресімдеу аймақтары стандартқа сай, бизнеске ыңғайлы болуы үшін «Атамекенге» қарамақ. Біз жеке инвесторлармен бұл жұмысты жүзеге асыруымыз қажет. Нәтижесінде палатаның беделі мен мүмкіндігі көтеріле түседі», деді Абылай Исабекұлы. Оның сөзіне қарағанда, Үкімет басшысы кеден арқылы жүктердің жедел өтуі жұмыстарын жеке бақылауында ұстап отыр. Кедендік кедергілерді, әсіресе, Ақтауда түбегейлі жою жөніндегі жоспарға қол қойылған. Нәтижесінде, құжаттар саны қысқартылып, ветеринарлық және фитосанитарлық бақылау жүзеге асырылатын болды. Ең бірінші кезекте Ақтау мен Қорғастағы кедендік инфрақұрылым жақсартылады.
Басқосуда Түрік Республикасы Сауда палатасы мен тауарлы биржа одағының президенті Рифат Хисарджыклыоглу, Әзербайжан Республикасы Кәсіпкерлердің ұлттық конференциясы президенті Мәмед Мұсаев және Қырғыз Республикасы Сауда-өнеркәсіп палатасының президенті Марат Шаршекеев сөз сөйледі. Олар кеңес жұмысын, бизнестегі ынтымақтастық, экономикалық бағыттардың дамуын талқылады.
Жиын барысында «Атамекен» ұлттық кәсіпкерлер палатасы басқарма төрағасының орынбасары Нұржан Әлтаев үлкен нарықтарға шығу үшін түркі елдерімен серіктесу маңызды екенін әңгімеледі. «Өзбек, әзербайжан, қырғыз және түрік әріптестерімізбен барынша байыпты түрде серіктесуіміз қажет. Әсіресе, біздің әзірше тәжірибеміз жоқ бірқатар өнім түрлері бойынша жұмыстарды жандандырған жөн. Мәселен, біз ешқашан өндірмеген өнім Түркияда бар. Біз олармен серіктесіп, тәжірибелерін, технологияларын алуымыз керек. Түріктер мұндай серіктестікке дайын», деді Н.Әлтаев.
Палата өкілінің сөзінше, Ресей мен Қытай сияқты iрi елдерден түсетін сұранысты қанағаттандыру үшін Қазақстан көрші елдермен бiрiгiп жұмыс атқарғаны абзал. Айталық, Қырғызстан, Өзбекстан, Әзербайжан және Түркия мемлекеттерімен тiлiмiз ұқсас, мәдениетiмiз, дiнiмiз бір. Осы елдермен кооперацияланып, жақын iрi нарықтарға жол ашу керек. «Қытай мен Ресейден азық-түлікке сұраныс өте жоғары. Ал Қазақстан оны қанағаттандыра алмай отыр. Сол себептен Қазақстан Түркиямен бiрiгiп, жобалар жасауда. Сондай жобалардың бiрi – термиялық өңделген тауық аяқтары өнiмiнiң өндiрiсi. Біз мұнымен Қытай нарығын қамтамасыз етеміз», деді Н.Әлтаев. Оның айтуынша, жақын арада Түркітілдес мемлекеттердің іскерлік кеңесіне Өзбекстан да кірмек.
Асхат РАЙҚҰЛ
«Егемен Қазақстан»