Шараға мемлекет пен қоғамның барлық маңызды салаларында табысты еңбек етіп жүрген ер-азаматтар мен даңқты әйелдер қатысты. Кітаптың мазмұны тәуелсіз мемлекетіміздің қалыптасу жолында аянбай еңбек сіңірген азаматтардың өмірбаяндық тарихы мен портреттік галереясымен толыққан.
Жиында сөз алған идея авторы Гуля Бабулова аталмыш жоба әрі қарай жалғасын табуы мүмкін екенін айта келіп:
– 2014 жылы «Жаңа дәуір. Табыс коды» жобасын бастаған болатынбыз. Бүгін екінші, үшінші кітабын жарыққа шығарып отырмыз. Президентіміз Н.Назарбаевтың «біз жаңа қаһармандарды жасауымыз керек» деген сөзін естіген бойда, осындай жоба жасасам қайтеді деп ойланып қалдым. Ақыры идеяны жүзеге асырып, қоғамның әр саласында қызмет ететін түрлі адамдар туралы естеліктерді бір топтамаға жинадық. Олардың әрқайсысы – өз еңбектерімен биікке көтерілген, ел мүддесіне қызмет етіп жүрген жандар. Шын мәнінде, ондай үздіктер өте көп. Жобаны жасау кезінде қаншама жайсаң жандармен танысып, табысып кеттік, – деді.
Ұлттық музейге жиналған бүгінгі қаһармандар ерлігі мен еңбегіне тоқталып өткен ол, көпшілікке ұсынылып отырған энциклопедиялық жинақтың маңызы мен мақсаты туралы айтып өтті.
− Қазақ елінің көрнекті әйелдері: Арман алға жетелеп. Выдающиеся женщины Казахстана: Созидая мечту» кітабын шығарудағы басты мақсат – қазақстандық әйелдердің еліміздің тәуелсіздік алуы мен мемлекеттігімізді қалыптастыруға қосқан үлесі жайлы құжаттық куәлік қалдыру. Басылымға саясат пен биз-
несте, қоғамдық өмірде, білім мен спортта, өнер саласында, білім беру және медицина саласында жетістіктерге жеткен әйелдер туралы очерк-
тер енгізілген, – деді Г.Бабулова.
Кітапқа енген кейіпкерлердің бірі Сиязбек Далиев – паралимпиада ойындарының чемпионы, жүзуден халықаралық дәрежедегі спорт шебері. Өзінің айтуынша, 12 жасында ауыр жарақат алып, екі қолынан айырылған.
«Басында өте қиын болды, – деп еске алады Сиязбек, – Жаттықтырушым мені үйрету үшін, алдымен өзінің қолын байлап тастап, жүзіп көрсетті. Мен суға батып кетем деп қатты қорқатын едім. Дегенмен, бір апта ішінде жүзуді үйреніп алдым».
Жарты жылға жетпей жүзуге әбден төселіп алған Сиязбек қалааралық турнирлерде бақ сынап жүріп, жеңісті жолын әрі қарай жалғастырды. 2011 жылы Араб Әмірлігінде өткен I Дүниежүзілік паралимпиада кезінде алтын медальға қол жеткізеді. Басылымда Сиязбек сияқты қоғам өмірінде белсенділігімен көзге түскен, отбасы мен балалар игілігі үшін үлес қосып жүрген қарапайым ел азаматтары ескерусіз қалмаған. Мысалы, қостанайлық Нұрлан Садықов пен жұбайы Қарлыға екеуі – көп балалы отбасы. Балалар үйіндегі он баланы бауырына басып, асырап-жеткізген екеуі, бүгінде жапырағын кеңге жайған мәуелі бәйтерекке айналды.
Үш мың данамен жарық көрген кітап Қазақстанның барлық кітапханалар жүйесіне таратылған.
Ая ӨМІРТАЙ,
«Егемен Қазақстан»
Суретті түсірген
Орынбай Балмұрат,
«Егемен Қазақстан»
