Айдын иелері «ә» дегеннен алға ұмтылып, небәрі 30 секундтың ішінде есеп ашып үлгерді. Талғат Жайлауов пен Максим Беляев жеткізген шайбаны Иван Иванов қақпаға дәл бағыттады. Шығысқазақстандықтардың тегеурінді шабуылынан абдырап қалған қонақтар осыдан кейін барынша сақ ойнауға тырысып бақты. Нәтижесінде, «Рубин» сапынан Дмитрий Клопов 14-минутта таразы басын теңестіріп кетті. Бұл тұста олардың бір хоккейшісі артық болғанын айта кеткен жөн. Дегенмен, арада бірер минут өтер-өтпесте өскемендіктер тағы да алға шықты. Кездесудің 16-минутында Евгений Белухин мергендігімен көзге түсті.
Екінші кезеңнің бастапқы минуттары да осы бағытта өрбіген еді. Жерлестеріміз басымдықты арттыру үшін қарсыластарын қыспаққа алумен болды. Бірақ, 29-минуттан бастап айдындағы жағдай күрт өзгеріп салды. Қонақтар сапынан Виталий Каменов есепті 2:2-ге жеткізді. Айдарынан жел ескен ресейліктер екінші кезеңнің соңына дейін «Торпедоны» екі рет қапы қалдырды. Матчтың 31-минутында Александр Акмальдинов қақпа артындағы шамды тағы бір мәрте жарқ еткізсе, 38-минутта Дмитрий Клопов дубль иесі атанып, ойындағы соңғы нүктені қойды.
Кездесудің соңғы бөлігінде жерлестеріміз жағдайды түзеу үшін аянып қалмады. Иван Иванов, Майк Далхьюзен сынды хоккейшілердің гол салатын мүмкіндіктері болған еді. Бірақ олар көздеген мақсаттарына жете алмады. Сөйтіп, матч 4:2 есебімен «Рубиннің» пайдасына шешілді.
Сонымен, сериядағы жалпы есеп 3:2 – «Торпедо» алда. Қос команда арасындағы алтыншы кездесу ертең Түменде өтеді. Егер, жерлестеріміз жеңіске жетер болса, Братина кубогының финалына шығады. Ал жеңіліп қалған жағдайда шешуші матч Өскеменде өтеді.
Аян ӘБДУӘЛИ,
«Егемен Қазақстан»
