Осыған орай Өскемендегі А.Пушкин атындағы облыстық кітапханада «Алаш туы астында Күн сөнгенше сөнбейміз» атты мәдени шара өтті. Шара барысында Сәрсен Аманжолов, Баламер Сахариев, Бошай Кітапбаев, Құмаш Нұрғалиев, Оралхан Бөкей, Әлібек Асқаров, Дидахмет Әшімханов сынды есімдері елге белгілі тұлғаларды түлеткен мектепте әр жылдары сабақ берген мұғалімдер мен тәлім алған шәкірттер естеліктер айтты.
– Шыңғыстай мектебінде мықты дәстүр бар. Осы білім ордасынан мектеп бітіргендер арасынан қалам ұстап, жазушылыққа бет бұрғандар көп. Неге? Біреулер айтады: «Жомарт Нұрғалиев деген әдебиетші ұстазымыз болды. Сол кісінің мықтылығынан», деп. Ол кісінің мықтылығына күмәніміз жоқ. Бірақ ойлап отырсам, сонау 1914 жылдары бұл мектепке Сұлтанмахмұттың келуімен арада бір сабақтастық, байланыс бар сияқты. Кейін қазақ әдеби сынына Баламердің шығуы, содан соң Оралханның келуі, одан кейінгі Әлібек, Дидахметтердің әдебиетке тыңнан түрен салуы, осылардың арасында бір берік рухани байланыс бар, – деді кездесуде сөз алған жазушы, осы мектептің түлегі Әлібек Қаңтарбаев.
Осы мектепте оқыған Ербол Баянғазин Кеңес Одағында «КСРО халық мұғалімі» атағын 11 адамның алғанын, оның үшеуі елімізден, үшеудің бірі осы мектеп түлегі Құмаш Нұрғалиев екенін, бұл шаңырақты тәмамдаған түлектер арасынан 27 жазушы шыққанын айтып, кітапханаға өзінің Шыңғыстай ауылы туралы жазған кітабын тарту етті.
Азамат ҚАСЫМ,
«Егемен Қазақстан»
ӨСКЕМЕН
