Іске нүкте қойылды

2010 жылдың 26 шілдесі күні Алматы қа­лалық қаржы полициясының майоры Кен­жебай Жұмабеков осы қа­ладағы қойма­лардың бірінен Қытайдан алаяқтық жолмен контрабандалық тауар әкелген кәсіпкерді тұтқындайды. Майор Кенжебай Жұмабе­ковке «Қорғас» бекетіндегі сенімді адамдар күдікті тауар өткенін, оның иесі бұған дейін де талай рет заң бұзушылыққа барған кәсіп­кер әйел екенін хабарлап үлгерген болатын. Қылмыс болған орынға бірнеше адам­­мен келген Кенжебай Жұмабеков күдіктінің тауарларын тексермек бола­ды. Көкбеттікке салынған кәсіпкер әйел сол арада полиция қыз­меткеріне қоқан-лоқы көрсетіп, аузына келген балағатын аямай­ды. Ол кәсіпкер әйелдің жақ­тас­тары мен серіктері де қар­сылық көрсетіп бағады. Сол арада тамам жұрттың кө­зінше полиция майоры         К.Жұмабековке: – Сен, майор, кіммен байла­нысып тұрғаныңды біл. Менің артымда кімнің тұрғанын білесің бе?. Енді қызметіңмен қоштаса бер, бітті  жақсы болмайды! – деп айғайға басады кәсіпкер әйел. Бұл сөздерді сол арада болған адамдардың барлығы да естиді. Ал кәсіпкер әйел болса полиция майорына айбат шеккен күйі, бағынбай үйіне кетіп қалады. Сол күннің ертесінде, яғни, 2010 жыл­дың 27 шілдесі күні  кәсіпкер әйел өз ая­ғымен Алматы қалалық қаржы полиция­сына келіп, майор Кенжебай Жұ­мабековке жолығады. Ол әйел алдымен полиция майорын жоғарыда айтқан қорғаушысымен қорқытып-үркітеді. Оны­мен қоймай, осы істі жауып тастауға және де бұдан былай да майордың анау дөкей сияқты «крышасы» болуға ұсыныс жасап, майорға ірі көлемде пара ұсы­на­ды. Бұл әрекетінен ештеңе шықпаған соң кәсіпкер өзінің бір топ сыбай­ластарымен бірігіп, баспасөз мәслиха­тын өткізіп, қаржы полициясының қызмет­кері К.Жұмабековты айыптап, шу көтереді. Оның бұл айтқандарына сеніп қалған біраз басылымдар, журналистер – Алматы қала­лық қаржы полициясын ғайбаттап, кәсіпкер әйелді ашық қолдап, жалған хабарлар тарата бастайды. Осыдан кейін құқық қорғау орган­дарына шынайы шындықты шыңыраудан шығаруға тура келеді. Алматы қалалық қаржы полициясы бастығының орынба­сары Айдос Ахмадиев 2010 жылдың 21 қаза­нын­да баспасөз мәслихатын өткізіп, алаяқ­тықпен аты шыққан кәсіпкердің бүкіл қылмысын  журналистердің алдын­да жайып салады. Қаржы полициясы бастығының орынбасары А.Мұхамедиев алаяқ әйел жалған құжат жасап «Қорғас» бекеті кеденіне 1,5 миллион теңге тұратын станоктар мен құбырлар әкеле жатырмын деген жалған мәлімет береді. Шын мәнінде тексеріс кезінде анық­талғандай, ол көрсеткен заттар емес,  9,3 миллион теңге тұратын үй жиһаздары мен көпшілік тұтынатын тауарлар алып өткенін, сонымен алаяқ кәсіпкер әйелдің ірі көлемде экономикалық қылмыс жасағанын, полиция майоры Кенжебай Жұмабеков пен оның қасындағы серіктеріне де өтірік жала жапқанын, кәсіпкер әйел жалаларының еш негізсіз екенін, сөйтіп, прокурордың санкциясы бойынша 2010 жылдың 20 қазанында оның тұтқындал­ғанын, қазір оның үстінен қылмыстық іс қозғалғанын хабарлайды. Сонымен қатар А.Мұхамедиев, 2010 жылдың 27 шілдесінде кәсіпкер әйелдің Ал­маты қалалық қаржы полициясының майоры Кенжебай Жұмабековке оның қыз­мет орнында пара беріп жатқан кезінде тұтқындалғанын, сол күннің ертесінде кә­сіп­кердің пара ұсынушы ретінде айып­талып отырғанын, прокуратура тарапынан әйелдің полиция қызметкері К.Жұма­бековке пара беріп жатқан сәтінің бей­нетаспаға толық түсіріліп алынғанын, оның бұлтартпас дәлел екенін қоса мәлімдеді. Кәсіпкер 2010 жылдың 8 қазанында Ребенчук бастаған адвокаттармен баспасөз мәслихатын өткізіп, қаржы полициясының қызметкері К.Жұмабековтің одан ірі көлем­де пара алғысы келгені сияқты жалған ақ­парат таратады. Жоғарыдағы  басылым­дар тағы да «жапа шеккен-мыс» деп, кәсіпкер әйелді қолдап, Алматы қала­лық қаржы полициясын айыптап, ақпарат­тар тара­тады. Ол жалған ақпаратта кәсіпкер  полиция қызметкері  К.Жұма­беков­тің одан 10 мың АҚШ доллары көлемінде пара талап еткенін, кәсіпкердің ондай көлемде ақшасы болмағандықтан К.Жұмабековке небары 7 мың АҚШ долларын бермек болғанын айтады. Негізінде алаяқ кәсіпкер пара беріп жатқан жерінде тұтқындалады. Осы арада тағы бір назар аударатын мәселе «Время» га­зетінің тілшісі Тохнияз Күші­ковтың әлгі кәсіпкер әйелдің контра­бандалық жолмен Қытайдан тауар өткізіп, ұстал­ғаны туралы хабары осыдан үш жыл бұрын жарияланған бола­тын. Атап айтқанда, кәсіпкер басқаратын оның «Азамат трэ­вел» компаниясының Қытай­дан заңсыз жолмен екі жүк көлігін өткізгені, декларацияда 19 миллион 400 мың теңге тұратын асүйі жиһаздары деп жалған көр­сетіп, шын мә­нінде, басқа тауарлар өткізіп ұс­тал­ғаны, соңы­нда «Азамат трэ­вел» компания­сы­ның дирек­торы ірі көлемде, яғни 5 миллион теңге айыппұл тө­ле­ге­ні  хабар­ланған. Мінеки, өзде­ріңіз көріп отыр­ғандай, алаяқ бір ғана кәсіпкердің мемлекетіміздің абыройына, эко­номикасына қан­шалықты зиян кел­­тіріп отыр­ғанын, ал, әлі ашылмаған, ашылса да алаяқ кәсіпкер сияқ­ты­лардың өздері ой­лап тапқан қор­ғаушысы сияқ­тылардың есебінен қаншама жабулы қазан жабулы күйінде жатқанын ойлағанда төбе шашыңыз тік тұрады. Еліміздегі кең етек алған жем­қорлық, оған жол беріп отыр­ғандардың түптің-түбі жаза­ла­натынына біз сенеміз. Алматы қалалық қаржы поли­циясының майоры Кенжебай Жұмабеков сынды қырағы, өз ісіне адал, мемлекетке берілген азаматтардың қатар­лары бұдан да көп болса, қандай әділеттілік орнар еді десеңізші! «Жақсының жақ­сы­лығын айт, нұры тасы­сын!» деген дана халқымыздың бұл қанат­ты сөзінің аста­рында көп нәрсе жатыр. Таяуда кәсіпкер әйелдің ісіне Алматы қаласының Медеу аудандық соты нүкте қойды. Бейсен НАРЫНБАЙ, журналист. Алматы.