Әсіре әсерсіз сөз – осы. Қытайдың Чанша қаласында қаңтардың орта шенінде басталған «Singer-2017» байқауы сенбінің кешінде мәресіне жетті. Күллі дүние көз тіккен беделі биік додада бақ сынаған қандасымыз Димаш Құдайберген екінші тұғырдан көрінді. Жанкүйерлердің дені әттеген-ай десе де, гонконгтік әншінің (Sandy Lam) жерлесімізден бір тұтам ілгері озғандығы заңды да. Өйткені, жарыстың да, жүлденің де иесі – жер бетіндегі ең көп халық.
Сөзіміз тұшымды болу үшін, байқау барысынан аз-кем баяндасақ. Димаштың даңқын асқақтатқан доданың он төрт кезеңінде де қазақ баласы үнемі үздіктердің қатарынан көрінді. Шын дарын мен саф талантқа бас иген миллиард-
тар қандасымызды «Азияның ең танымал әншісі» атағымен марапаттады. Бұған қоса, әнші «17th China Music Awards» шарасында «Халықаралық деңгейдегі танымал әнші» жүлдесін де қанжығасына байлады.
Бірінші кезең бәріміздің есімізде. Француздың «SOS d’un terrien en détresse» әнін орындап, көрермен қошеметіне бөленген Димашты қытайлық музыка мамандары сол кезде-ақ «Тәңір назарына алған әнші» деген. Ал біздің әншімізге еліткен ұлттың бақандай
3 миллион табынушысы қазақша үйрене бастады. Димаштың алғашқы әнінен кейін әлеуметтік микроблогына жазылушылардың саны бір сағатта 35 мыңнан 118 мыңға жеткенін қайтерсіз.
Келесі бәсекеде Димаш ресейлік әйгілі әртіс Витастың «Опера 2» атты шығармасын аса жоғары деңгейде шырқап, мерейімізді үстем еткені есте. Сол тұста ғой көпшілік оны «Екінші Витас» атағаны. Алайда, туған топырағын кие тұтатын әнші «Мен қазақтың Димашымын» деді.
Иә, бас жүлдені еншілемесе де Димашты әлем таныды. Оның орындаушылық шеберлігі мен ешкімге ұқсамайтын ерекше даусына әлемдік сахнадағы өнер жұлдызы Лара Фабиан таңданып, атақты актер Джеки Чан бетпе-бет жүздесуге келді. Димаш мықтылардың ығына жығылмай, өз ұлтының намысын биік ұстағаны да абырой болды.
Ұлттық намыс дегеннен шығады, әншімізден жанкүйерлері «Сүйікті кітабың қандай?» деп сұраса, Мұхтар Әуезовтің «Абай жолы» романы туралы айтып беріпті. Содан кейін әдебиетіміздің классикалық туындысының қытай тіліндегі аудармасының сатылымы да күрт артқан көрінеді. «Димаш оқыған кітапты біз де оқуымыз керек» дейтін өзге ұлт өкілдерінің шоғыры қалың.
Жетінші кезең ше?.. Жетінші кезеңде Димаш өз репертуарындағы «Дайдидау» әнімен тыңдармандардың жанын тебірентті. Қытай жұрты қазақтың саф ұлттық өнер нақышына тәнті болды. Қазақ баласының әнінен кейін оның жобадағы әріптесі, қытайлық әнші Ли Жян: «Димаштың әні аса шынайы шықты. Оның бұл әнді жанына сіңіргені байқалады. Димаштың көзінде өмірдің сан қырын көрген адамның бейнесі бар. Бұл оның әртістік қабілеті емес, таланты», деп әділ бағасын берді.
Осы жоба Димашты Қытай еліне танытса, Димаш та аталған байқауды басқа шет елдерге танытты деуге болады. Себебі, ол ағылшын, орыс, француз, итальян тілдерінде әндер шырқады. «Қытайда Димаш пен Қазақстан қазір егіз ұғымға айналды. Мен мұны өз көзіммен күн сайын көремін. Димашты Қытайдың тоқсан пайызы біледі десем, өтірік болмас» дейді әншінің менеджері Алпамыс Шаримов.
Оның айтуынша, жанкүйерлері Димаш сахнаға киіп шыққан киімді кигісі, оның қолындағы заттарды ұстағысы келеді екен. Енді біздің ұлдың бейнесімен компьютерлік ойындар шықпақ. Онда да Димаш көрермендерімен «Дайдидауды» салған бейнесімен жүздеседі.
Соңғы бәсеке жайында бірер сөз. Димаш онда өзін «Музыка саласына төңкеріс әкелген талантты әнші» деп мойындаған қытайлық танымал өнерпаз Шан Вэньцземен қосылып, Майкл Джексонның «Earth Song және Dangerous» әндерін орындады. Қытайдағы ақпарат құралдары мен әлеуметтік желілерінде қандасымызды жобадағы «Супер әнші», «Singer-2017» тележобасының бренді» деп бағалағандар да кездеседі. Миллиондаған пікірлердің ішінде Қытайдағы танымал «Netease» сайтының пікірі былай өрбиді: «Димаш жобада жарқырап көзге түсті де, көкжиекті жарып шыққан қанатты тұлпардай әлем кеңістігіне самғады. Ол жоба барысында миллиондаған жандарды өзіне тәнті етіп, аудиториясына терең махаббат дарытты. Финалдың нәтижесі қалай болса да, Димаш бұл жобаның жеңімпазы».
Айта кетейік, жүлдегерлердің тағдырын көрермен залында отырған 500 адам шешті. Олар ақырғы жеңісті тартысқа толы бәсекеде барлық кезең бойынша Димашпен үзеңгі қағыстырып келе жатқан Sandy Lam-ға берген.
Асхат РАЙҚҰЛ,
«Егемен Қазақстан»