Ұлттық патриотизм үлгісі кіндік қаның тамған жерден, туған өлкеге сүйіспеншіліктен басталады. Қалалық болып жүргендердің қай-қайсысы да осы шағын мекендердің топырағы сыйлаған сарқылмас қуаттың күшімен азаматтық болмысын қалыптастырып, өмірлік мақсатын орындап келеді.
Елбасы Нұрсұлтан Назарбаевтың «Егемен Қазақстан» газетінде жарияланған «Болашаққа бағдар: рухани жаңғыру» атты бағдарламалық мақаласында «Патриотизм кіндік қаның тамған жеріңе, өскен ауылыңа, қалаң мен өңіріңе, яғни туған жеріңе деген сүйіспеншіліктен басталады» деп тереңнен қозғағаны да сондықтан. Мемлекетке деген сүйіспеншілік туған жерге деген ыстық ықыластан бастау алады.
Алайда, ауылынан әлденеше жыл бұрын ұзап кеткендер күзгі жапырақтай сарғайған сағынышын жылы естеліктермен бөліссе ғана басылатындай, жарыса әңгімелеп, сол сәтте ғана сөз етумен шектеліп, уақыт өте келе тым-тым алыстай бастайтыны бар. Қаланың у-шуынан қашқандай, қауырт тіршілігінен көңілі қалғандай болып «Ах, менің ауылым», «қайран, менің қара орман, алтын бесігім» деп танауын желіне, кеудесін көкорай шалғынына төсеп, үздігіп барғандардың өздері екі күннен артық шыдай алмай, шаһарын бетке алып жатады. Тіршілік қамымен қала жағалап, қоныс тепкендер де шаруасы болмаса, тиіп-қашып бара бермейді.
Мемлекет басшысы Н.Назарбаевтың бағдарламалық мақаласынан таяу жылдарға белгілеген міндеттерінің ішінде «Туған жер» бағдарламасы қабылданатынын, оның ауқымы біртіндеп «Туған елге» ұласатынын оқи отырып көңілімді мақтаныш сезімі кернеді. Елбасының «Ауылым – әнім» атты әнді айтқанда, «Туған жерін сүйе алмаған, сүйе алар ма туған елін» деп шырқайтын едік қой. Бажайлап қарасақ, бұл мағынасы терең сөздер» дегені тамыры туған жеріне байланған қазаққа «алтын қазығыңнан алыстама» дегенді айқын аңғартады.
Бәріміз де ауылда тудық, қара топырағында асыр салып өстік. Шет елдерге сапарға шыққанда үнемі жусаны аңқып, түтіні бұрқыраған ауылым көз алдымда тұратын. Ауылға деген сағыныштан бір әуеннің сазы көкірегіме келіп құйылып жүруші еді. Өзім де арасында ыңылдап қоямын. Ара-тұра «осы әуеннің сөзін кімге жаздырсам екен?» деп ойлап қоямын. Сөйтіп, ақын Бәкір Тәжібаевқа қолқа салдым. Бұл, шамасы, 1974 жыл болатын. Ол да ауылдан шыққан азамат қой, демде жазып берді. Елбасының туған жерге қатысты сөзіне арқау болған «Ауылым – әнім» осылай туған еді.
Елбасының мақаласы турасын айтқанда, ұлтымыздың ұясы, алтын бесігі, ырыстың кіндігі саналып келе жатқан ауыл туралы салиқалы сөзі көңілге ерекше бір серпін берді. Ауыл түлесе – қазақ түлейді. Өйткені, ауыл мен қазақ ажырамас ұғымдар.
Мемлекет басшысы Нұрсұлтан Назарбаев «Адам баласы – шексіз зерденің ғана емес, ғажайып сезімнің иесі. Туған жер – әркімнің шыр етіп жерге түскен, бауырында еңбектеп, қаз басқан қасиетті мекені, талай жанның өмір-бақи тұратын өлкесі. Оны қайда жүрсе де жүрегінің түбінде әлдилеп өтпейтін жан баласы болмайды» деп жазады бағдарламалық мақаласында. Жүрек тебірентерлік, туған жердің ұлылығын ұғындырар сөздер. Алдағы уақытта «Туған жер» бағдарламасының аясында туған елдің де еңсесі биіктейтіні сөзсіз.
Ескендір ХАСАНҒАЛИЕВ,
Қазақстанның халық әртісі, Мемлекеттік сыйлықтың лауреаты
АЛМАТЫ