М.Х.Дулати атындағы Тараз Мемлекеттік универстиетінде Мемлекет басшысы Нұрсұлтан Назарбаевтың бағдарламалық мақаласын талқылауға арналған «Рухани жаңғыру – мемлекеттің тірегі, халықтың жігері» атты облыстық форум өтті. Форумға облыс әкімі Кәрім Көкірекбаев қатысып, баяндама жасады.
– Еліміз Тәуелсіздік алған жылдардың алғашқы сәттерінен бастап Елбасы саналы қоғам орнатуды, оның басты қағидаттарына ұлттық құндылықтарымыз негіз болатынын шаршамай, талмай үздіксіз айтып келеді.
Рухани өрлеу біздің қоғамға аса қажет және біздің дамуымыздың ең басты тұғырларының бірі. Өйткені, барлық дүние сана-сезімнен бастау алады. Бұл – мазмұны терең тарихи мақала. Ұлт руханиятын өркениет биі-
гіне шығаратын үлкен бағдарламалық құжат, – деді облыс басшысы. Сондай-ақ, Кәрім Көкірекбаев «Мәдени мұра», «Халық – тарих толқынында» бағдарламаларының өңір үшін де өркенді істерге бастамашы болғанын айта келіп, Елбасы мақаласында айтылған ағылшын тілін үйренудің маңыздылығы, латын әліпбиіне көшу қажеттігі төңірегінде де өз ойын ортаға салды.
Форум барысында сөз алған М.Х.Дулати атындағы Тараз Мемлекеттік университетінің ректоры Махметғали Сарыбеков рухани жаңғырудың ғылыми негіздеріне тоқталды. Сондай-ақ, білімнің салтанат құруы жөнінде де пікір білдірді.
Елбасы өзінің бағдарламалық мақаласында ХХІ ғасырдағы ұлттық сана туралы кеңінен сөз еткені белгілі. Тараз Мемлекеттік педагогикалық институтының ректоры Дария Қожамжарова өткен ғасырдағы қазақ халқының тағдырына байланысты жайларды баяндай келе, ХХІ ғасырдағы ұлттық және тарихи сана төңірегінде қалыптасқан ойымен бөлісті. Ал жазушы-драматург Елен Әлімжан, Қазақстанның халық әртісі Мәкен Рахымжанова еліміздің мәдени-рухани дамуы төңірегінде әңгімеледі.
Елбасы ағылшын тілін үйренудің маңыздылығын әрдайым айтып келеді. Сондықтан да, жастардың тіл үйренуде табанды болуы жарқын болашақтың кепілі бола алады. Бұл тұрғыда Әулиеата өңірінде тіл білетін, бәсекеге қабілетті жастар баршылық. Соның айғағындай, М.Х.Дулати атындағы Тараз Мемлекеттік уни-верситетінің студенті Сағи Алтынкоп Елбасы мақаласына байланысты өз ойын қазақ, орыс және ағылшын тілдерінде жеткізді.
Хамит ЕСАМАН,
«Егемен Қазақстан»
Жамбыл облысы