– Саяжайлардағы 579 үй мен ауланы су басып, 1 174 адам қауіпсіз жерлерге көшірілді, 69 адам құтқарылды. Адамдарды уақытша орналастыру бекеттерінің жетеуінде 572 адам бар, оның 159-ы бала. Оларды үш рет тамақтандыру жағы ұйымдастырылған,– деді департамент бастығы Бауыржан Сыздықов.
Облыс аумағында 13 тасқынға қарсы штаб құрылып, тұрғындардан 1 834 өтініш түскен. Бөгет жасау үшін 4 145 текше метр инерттік материалдар әкелініп, 205,8 мың текше метр су айдалған. Хромтау мен Мәртөкте Елек пен Қарғалы өзендерінің арнасынан шығуы мүмкін деген жерлерін бөгеу бойынша алдын алу жұмыстары жүргізілді.
8 сәуірден бастап өңірде күн күрт жылып, қар тез ери бастаған-ды. Қарғалы және Ақтөбе су қоймаларының су жинағыштарында әлі күнге дейін жердің 11-ден 21 сантиметрге дейінгі тоң қабаты ерімеген. Яғни, жер бетіндегі қар мен мұз жерге сіңбей, су қоймаларға жиналуда.
16 сәуірде Ақтөбеде жергілікті деңгейде сипаты бар төтенше жағдай жарияланған болатын. Тасқынның салдарын жою орындарынан көшірілген азаматтардың мүліктерін тонауға жол бермеу мақсатында 21 бекет орнатылды. Материалдық құралдарды шығаруға және уақытша орналастыру бекеттеріне жеткізуге көмектесу топтары жіберілді.
Сондай-ақ, су тасқынынан зардап шеккендерге көмек көрсететін әлеуметтік комиссия құрылды. Оны Ақтөбе қаласы әкімінің орынбасарлары Ләззат Оразбаева, Рузия Айдашева басқарады. Комиссия отырысы кезінде ортақ есепшот ашылды. Ақтөбедегі іскер әйелдер қауымы көмектесуге дайын. Ал «Нұр Отан» партиясының мүшелері бір күндік жалақыны аударуға үндеу тастады. Комиссияның негізгі жұмысы су тартылып, саяжайдағы үйлерге кіру мүмкіндігі берілген кезде жанданады. Әзірге, заттай, қаржылай көмек бір жерге жиналады.
Темір ҚҰСАЙЫН,
«Егемен Қазақстан»
АҚТӨБЕ
