Жайлы баспанаға деген мұқтаждықты қанағаттандырудың, оңтайлы шешудің жолдары көп. Солардың бірі – халықтың әлеуметтік әлсіз топтары үшін сатып алу құқығынсыз жалгерлік тұрғын үйлер салу. Бүгінгі таңда бұл санаттағылар үшін екі тұрғын үйдің құрылысы жүргізіліп, нәтижесінде 212 отбасы баспанаға ие болады. Сол сияқты Елбасы тапсырмасына орай жекеменшік үйлер тұрғызу мақсатымен тиісті жер телімдері бөлініп, қажетті инфрақұрылым тұрғысынан да қолдау жасалуда. Мәселен, Петропавл қаласы маңындағы Солнечный кенті аумағынан 740 гектар жер телімі босатылып, сумен, жарықпен қамтамасыз етіледі. Кенттің инфрақұрылымдық жүйесіне Ұлттық қордан 1,3 миллиард теңге бағытталған.
Облыстық құрылыс басқармасы басшысының орынбасары Владислав Лукиннің айтуынша, 2015-2019 жылдарды қамтитын «Нұрлы жол» бағдарламасы шеңберінде «Бәйтерек» Ұлттық басқару холдингі» бөлген 3,4 миллиард теңгеге облыс орталығында 10 көп қабатты тұрғын үйдің құрылысы басталып, үшеуі пайдалануға берілді. Қалғандары жыл аяғына дейін іске қосылады. Яғни, 600 пәтер өз қоныстанушыларына есіктерін айқара ашады деген сөз. Көпқабатты үйлердің көптеп бой көтеруі арқасында «Береке» секілді сәулетті ықшамаудандар пайда болды.
Жыл аяғына дейін барлығы 16 тұрғын үй қолданысқа берілсе, кезек саны 1446 адамға кемитін болады.
Өмір ЕСҚАЛИ,
«Егемен Қазақстан»
Солтүстік Қазақстан облысы
