Астана қаласының әкімі Әсет Исекешев елордадағы су тасқыны қаупі толық бақылауда екендігін мәлімдеді.
Шаһар басшысы қала әкімдігінде Ауыл шаруашылығы министрлігі Су ресурстары комитеті өкілдерінің, Сәтбаев атындағы қалалық канал басшылығы мен басқа да арнайы қызмет өкілдерінің қатысуымен арнайы баспасөз мәслихаты өткенін еске алып, шара аясында мамандар Астана су қоймасында қалыптасқан жағдайды түсіндіргенін тілге тиек етті.
Толассыз жауған жаңбырға байланысты Есіл өзеніне 13-15 сәуір күндері 340 млн текше метр көлемде су қосылған. Қазгидромет орталығының мамандары 100-160 млн текше метр көлемінде су келеді деп болжаған болатын. Алайда, күннің күрт жылынуына байланысты қардың еруі де жылдамдаған. Осы себепті, тасқын су қоры күткен көлемнен мол болған.
Қазір Астана су қоймасына келіп жатқан судың көлемі секундына 150-200 текше метрді құрап отыр. Оның барлығын су қоймасында сақтап қалу мүмкіндігі бар. Жалпы, Астана су қоймасының сыйымдылығы 410 млн текше метр болса, ол жерде бүгінде 385 миллион текше метр су толтырылған. Яғни, тағы 25 млн текше метр су сыйымдылығы бар деген сөз. Бүгінде жағдай бақылауда. Астана қаласында су тасқынына қарсы жедел штаб жұмыс істеуде және олар кешенді жоспарын, тиісті жұмыстарын жүзеге асыруда.
Нұрлыбек ДОСЫБАЙ,
«Егемен Қазақстан»
АСТАНА