Іс-шараға Парламент депутаттары, мемлекеттік органдар мен қоғамдық ұйымдардың өкілдері және «Болашақ» бағдарламасының түлектері қатысты. Жиын барысында Мемлекет басшысының мақаласында көрсетілген білім беру сапасын арттыру, жастармен жұмыс, рухани құндылықтарды сақтау, қазақ тілін латын әліпбиіне көшіру және басқа да мәселелер талқыланды. Жиынға Парламент Мәжілісінің депутаты, «Болашақ» қауымдастығы кеңесі төрағасының міндетін атқарушы Бақтияр Мәкен модераторлық етті.
Алғашқы болып сөз алған Парламент Мәжілісінің депутаты, Олимпиада чемпионы Серік Сәпиев Мемлекет басшысының барлық бастамаларын толық қолдайтынын айта келіп, қай кезде де саламатты өмір салтының орны бөлек екеніне тоқталды. «Ең бастысы, Елбасымыз кезекті рет саламатты өмір салтының маңыздылығын және қажеттілігін атап отыр, – деді ол осы жөнінде. – ХХІ ғасырда дені сау ұлт қана бәсекелестікке қабілетті бола алады. Президентіміздің «Туған жер» бағдарламасын әзірлеу, сондай-ақ, «Қазақстанның қасиетті рухани құндылықтары», «Қазақстандағы 100 жаңа есім», «Жаңа гуманитарлық білім. Қазақ тіліндегі 100 жаңа оқулық» жобаларын жүзеге асыруға қатысты ұсыныстарына толық қолдау білдіреміз».
Ал ұлттық сананы жаңғырту адамды дамытудың маңызды қадамы. «Елімізде тарихи ескерткіштер өте көп, – деді ол сөзінің соңында. – Бірақ, олар әлемдік деңгейде кеңінен насихатталмай жатыр. Сондықтан Қазақстанның имиджін көтеріп, халықаралық аренада мәртебесін арттыру үшін егемен еліміздің тарихи және мәдени мұраларын таныстыруға ұмтылуымыз қажет».
Ал «Халықаралық бағдарламалар орталығы» АҚ президенті Жанболат Мелдешов еліміздің аймақтарында болашақтықтардың жасыл саябағын салуды ұсынды. «Еліміздің әр аймағында ағаш отырғызып, болашақтықтардың бағын жабдықтауды ұсынамын, – деді ол. – Оның барлығы өзіміздің қаражат есебінен жүзеге асырылады. Бұл саябақтарға ата-аналарымыз, аға-әпкелеріміз келіп демалады. Өйткені, «Болашақ» бағдарламасы бойынша шет елдің оқу орындарында білім алған біздер мемлекет пен халықтың есебінен оқыдық». Сондай-ақ, ол Президентің «Болашақ» бағдарламасымен шет елдерде білім алып, елге оралған болашақтықтар балалар мен жастарға үлгі көрсетуі қажет екенін де ортаға салды. «Жақсы білім өмірде табысқа жеткізетінін олар біздер арқылы білетін болады», – деді Ж.Мелдешов.
Конференцияда «Қазақстан-2050» Жалпыұлттық қозғалысы кеңесінің төрағасы Мұхтар Мәнкеев, Білім және ғылым министрлігі жоғары оқудан кейінгі білім беру және халықаралық әріптестік департаменті директорының орынбасары Ақерке Абылайхан, тағы басқа да «Болашақ» бағдарламасының түлектері сөз алып, Елбасы мақаласының маңызы және мәні, ерекшеліктері жөнінде пікір білдірді.
Әлисұлтан ҚҰЛАНБАЙ,
«Егемен Қазақстан»