«Smart zholy» бағдарламасы Оңтүстік Азиядағы «Echelon Asia Summit» жетекші стартап-алаңымен бірге жүзеге асырылатынын айта кеткен жөн. Оның басты элементі конкурстық негізде іріктелген он жастар командасы әлемнің жетекші технологиялық хабының бірі – Сингапурдегі екі апталық бағдарлама шеңберінде өз жобаларын әлемдік деңгейдегі менторлардың тікелей басшылығымен бастапқы өнімін шығарғанға дейінгі жолдан өтіп, ірі азиялық корпорацияларға ұсына алады.
Жиынды ашып сөз сөйлеген қордың атқарушы директоры Қанат Жұмабаев заманауи бағдарламаның пайдасын салмақтап, оның қазіргі таңдағы өзектілігін әңгімеледі. «Smart zholy» жобасын іске асыру жастардың стартаптарын тек Қазақстанға емес, ғаламдық нарыққа шығарады. Сонымен қатар, Мемлекет басшысының Жолдауында жүктелген экономиканы жедел жаңғырту және цифрлық экономиканы құру міндетін орындап, Астананы технологиялық картадағы жаңа нүкте ретінде көрсетеді», деп сендірді ол.
Басқосуда Ақпарат және коммуникациялар министрі Дәурен Абаев аталған жобаны Президент бастамаларымен үндескен маңызды істердің қатарына жатқызды. «Баршаңызға мәлім, қазіргі кезде Қазақстанның Үшінші жаңғыруы аясындағы кешенді шаралар басталды. Мемлекет басшысының тапсырмаларына сай, Ақпарат және коммуникациялар министрлігі де технологиялық жаңғыруды қамтамасыз ететін жобаларды, оның ішінде «Цифрлы Қазақстан» мемлекеттік бағдарламасын әзірлеуде. Осы іргелі істерді жүзеге асыруда еліміз жаңа буын жастарға үлкен үміт артады. Сондықтан да «Smart zholy» жобасының басталуы жас стартапшыларға шынайы қолдау болатыны сөзсіз. Жобаға қатысушылар отандық инновациялық өнімдер қатарын арттырып қана қоймай, ақпараттық технологиядағы тәжірибелерін ел игілігіне жаратады деп сенеміз», деді министр.
Тұсаукесерде басқа қатысушылар да сөйлеп, ой-пікірлерін ортаға салды.
Асхат РАЙҚҰЛ,
«Егемен Қазақстан»