Біз бұл ойға «Түркі және славян тілдерінің біртектілігін насихаттау орталығының» құрылуына орай өткен баспасөз мәслихатынан кейін келдік. Алматыдағы «Қазақстанның орыс қоғамы» мен «Азат» азаматтық қозғалысының бірлескен отырысында түркі жұрты мен славян халықтарының тілдері бір арнадан бастау алады деген пікір айтылды. Бұл тақырыпта Олжас Сүлейменовтің қызғылықты материалдар ұсынып жүргені белгілі. Осы тақырыпты әрі қарай індете зерттеп, дамытпақ мақсатта Қазақстанның «Азат» азаматтық қозғалысының төрағасы Хасен Қожа-Ахмет 2014 жылы «Орыс тілі көне түркі тілі ме?» еңбегін кітап етіп бастырған. Қазақстанның орыс, казак және славян ұйымдары Үйлестіру кеңесінің қаржыландыруымен шыққан зерттеу еңбек тұсауы кесіліп отырған орталықтың негізгі оқыту құралы деуге болады.
Қазақстан казактарының бас атаманы Юрий Захаровтың айтуынша, ұлтаралық татулық пен достықты дамытудың бір жолы осы орталық болмақ. Атаман тілдік біртектілікті насихаттайтын орталық түркі және славян халықтарының өз ұлттық тамырларын тереңнен тануына, сол арқылы ынтымақтастықтың артуына үлес қосады деген сенімде.
Ал идея авторы Хасен Қожа-Ахмет «Мемлекеттік тілдің мәртебесін көтеру мәселесі көптен бері айтылып келе жатыр. Біз бұл мәселеге ғылыми тұрғыда келу керек деп шештік. Себебі, қазақ тіліне қатысты қаншама қоғамдық ұйымдар құрылды, нәтиже аз. Алдымен, қазақ тілін өзге ұлттарға жеңіл әрі тез үйретудің ғылыми әдістемесі жасалуға тиіс. Алдарыңыздағы кітапты шығарудағы бір мақсатымыз сол. Орыс тілінің көне түркі тілімен тамырлас екенін белгілі дәрежеде дәлелдедік. Ендігі міндет – соны жалпақ жұртқа ұғындыру. Тілдік бірліктердің тамырластығын білген адамға тіл үйрену қиындық туғызбайды, керісінше, қызығушылығын арттыра түседі деп ойлаймын», деді.
Насихат орталығы алдағы уақытта түрлі мекемелерде кездесулер мен дәрістер өткізіп, курстар ұйымдастыру сияқты бірнеше сала бойынша жұмысын жалғастырмақ. Айта кету керек, дәрістер мен тіл үйретуге арналған курстар тегін жүргізіледі.
Алмас НҮСІП,
«Егемен Қазақстан»
АЛМАТЫ