Алқалы жиын барысында Елбасы Нұрсұлтан Назарбаевтың «Егемен Қазақстан» газетінде жарияланған «Болашаққа бағдар: рухани жаңғыру» атты мақаласы талқыланды. Зиялы қауым өкілдері Мемлекет басшысының ой-толғамдары, рухани жаңғыруға қатысты ұсыныстары бірінші кезекте жас ұрпаққа арналғандығын түсіндірді.
Дін істері және азаматтық қоғам вице-министрі Абзал Нүкенов осындай шараларды басқа да оқу орындарында өткізсе артық болмас еді деген пікір білдірді. Себебі, бүгінгі жиын сынды салиқалы үнқатысулар аға буын мен жас ұрпақтың арасындағы рухани жаңғырудың маңызын терең түсінуге мүмкіндік береді. Ұрпақтар арасындағы сабақтастықты жалғастыруға септігін тигізеді. Сондай-ақ, ол жастарды өз болашақтарының иесі ретінде Елбасы макаласындағы идеяларды жүзеге асыруға белсене атсалысуға шақырды.
Абзал Нүкенов айтып өткендей, Ұлттық кодымыздың сақталуының бір кепілі ретінде университеттер мен институттарда, колледждерде Ұлттық құндылықтар мектебінің жұмысын ұйымдастырған жөн. Бұл мектеп дүние жүзінде болып жатқан, жастар үшін пайдалы жаңашылдықтарды олардың санасына сіңіруге ықпал ететін болады.
Оқу орындары жанынан Ұлттық құндылықтар мектебін құру туралы ұсыныс жиынға қатысушылар тарапынан қолдауға ие болды.
Арнұр АСҚАРОВ,
«Егемен Қазақстан»
АСТАНА
