Алқалы жиынның күн тәртібінде ұйымдық мәселе қаралды. Фархад Шаймұратұлы «Нұр Отан» партиясы облыстық филиалының төрағасы қызметіне облыс әкімі Қ.Ақсақаловтың кандидатурасын ұсынып, мемлекеттік, шаруашылық қызметтердегі еңбек жолымен, басшылықта жинақталған мол тәжірибесімен қысқаша таныстырып өтті. Конференция делегаттары ұсынысты бірауыздан қолдады.
Құмар Іргебайұлы жиналғандарға арнаған сөзінде өзіне үлкен сенім білдіргені үшін алғыс айтып, алда тұрған саяси-идеологиялық талаптарға тоқталды. Бұл ретте конституциялық реформалардан Елбасының «Қазақстанның Үшінші жаңғыруы: жаһандық бәскеге қабілеттілік» Жолдауынан, «Болашаққа бағдар: рухани жаңғыру» мақаласынан туындайтын басты қағидаттарға ерекше екпін түсіріп, делегаттар назарын жедел шешімін табатын мәселелерге аударды.
Агроөнеркәсіптік кешенді, инфрақұрылымды, жұмыспен қамтуды, ауылдағы кәсіпкерлікті, тұрғын үй құрылысын дамыту бағдарламаларынан туындайтын міндеттерді шешуде партия мүшелерінен белсенділік, іскерлік, зор ұйымдастырушылық қасиеттер қажет етіледі. Саяси, экономикалық қайта құрулардың заңды жалғасы болып табылатын рухани жаңғырудың үлгілі үдерістерін тәжірибеге айналдыра отырып, Елбасы ұсынған жобаларға бір кісідей қатысудың маңызы зор. Бизнес және шаруа қожалықтары өкілдері есебінен партия қатарын толықтыру, сапалық құрамға баса көңіл бөлу, қоғамдық бақылауды күшейту тапсырмалары жүктелді.
Кезектен тыс конференцияда жергілікті бөлімше төрағасының бірінші орынбасары Артур Молдағұлов биыл атқарылған жұмыстар туралы баяндама жасады.
Жиында филиалдың саяси кеңесі мен бюросының жаңа құрамы сайланды.
Өмір ЕСҚАЛИ,
«Егемен Қазақстан»
Солтүстік Қазақстан облысы
