Бүгінде дәмханаларға барсаңыз Қазақстанның өзге өңірлерінде кездеспейтін тағамдарға тапсырыс бере аласыз. Мәселен, кинодан көргеніңіз болмаса аяғыңыз жетпеген, мүмкін, өміріңіздің соңына да жолыңыз түспеуі мүмкін Африканың өзен, көлшігінде өсетін жайынның еті. Мархабат!
Осындайда еске түседі. 2004 жылы «Егемен Қазақстан» газеті тілшілерінің құрамында Үрімшіге жолымыз түскен. Күйтің қаласындағы кездесуден соң дәмге отырдық.
Айналмалы үстел, үсті қайысқан тағам. Қақ ортасында бұқтырылған алып тасбақа төрт аяғы төрт жаққа кетіп тарбиып жатыр. Тағы да біз білмейтін бақа, шаян еттерінен
даярланған тағамдар. Тіксініп қалдық. Делегацияны бастап барған ағамыз қабағын шытты. Әлгілерді дастарханнан алып кетуді өтінді. Сиыр, қой, жылқы етінен жасалған дәмді ғана әкелуді бұйырды.
Күтуші жақ аң-таң. «Біз бұл қымбат тағамдарды аса қадірлі қонақтар үшін ұшақпен өзге жерлерден алдырамыз», деген.
Ал оңтүстіктің кафе, мейрамханалары экзотикалық тағамдарды ұшақпен еш жерден алдырмайды.
Қазір Африка сомы оңтүстіктің бірталай аудандарында өсіріліп жатыр. Жақында Түлкібас ауданындағы бір шаруашылықтан көрдік. Шаруашылық иесі әлеуметтік желіден Африка сомы туралы оқып, пайдасына көз жеткізгеннен кейін Ресейде өсіріліп жатқан балық питомнигінен алдырған екен. Олармен тәжірибе алмасып, жайынды өсірудің қыр-сырын әбден меңгеріп алған. Бұл шаруашылықтың тиімділігі, төрт түлікті өсіру сияқты өріс қуалап табаныңнан тозбайсың. Қысқы жем-шөп үшін ала жаз бойы адыр қуалап, шөп шаппайсың. Белгіленген мезгілінде кесек-кесек ет тастап, тамақтандырсаң болғаны. Түйені түгімен жұтуға дайын бұл жайындарыңыз нағыз дер шағына жеткенде 120 келіге дейін тартады екен. Бір құнан қойдың салмағын ойға алып, бір жайыннан түсетін пайданы есептей беріңіз.
Бақтияр ТАЙЖАН,
«Егемен Қазақстан»
Оңтүстік Қазақстан облысы
