Мақаланы оқу үшін, одан белгілі бір қорытынды шығару үшін жазсақ керек-ті. Айтылған мәселе айтылған жерде қалады...
Барлығын ысырып қойып, мына өрескел қатені қараңыз!
«Б.Жырау даңғылы 51/1».
«Аграрлық несие корпорациясы» АҚ мекемесінің маңдайшасына баттитып тұрып шегелеген. Заманында «Көмекей әулие» атанып, Абылай ханның оң тізесін басқан кеңесшісі, әйгілі жырау – Бұқарекеңнің аруағынан ұялса нетті? Я болмаса, қала әкімі Нұрлан Әубәкіров мырза Бұқар жырау даңғылымен жүріп көрмеген бе? Немесе...
Әйгілі патша Иван Грозныйдың есімін «И.Грозный» деп жазып қойсақ, қалай шамданар еді, қалай көзге қораш көрінер еді?! Тарихты білмейтін дүмбілездердің «Б.Жырауын» оқып жылауың керек. Белгілі заң талаптарына сәйкес бекітілген көше атаулары жазылған тақтайшаларды қатесіз басып, біріздендіру тәртібін қатаң қадағалауға алу шарт. Қаланың сәулетін, бабаның сәулесін көлегейлейтін мұндай сорақы қателерден қашан арылады екенбіз?..
Мирас АСАН,
«Егемен Қазақстан»
ҚАРАҒАНДЫ
