Асыра айтқаным емес, Елбасының әр сөзі мені толқытты, тебірентті. Осындай ғажап елде өмір сүріп жатқанымызға, қоғамдағы тыныштық пен тұрақтылыққа тағы да риза болдық, рахмет айттық.
Қаншама ұлттың өкілі араздық дегенді білмей, бір шаңырақ астында тату-тәтті ғұмыр кешіп жатыр. Мен ешқашан қазақ емес екенімді сезініп көрмеппін. Осы елдің тең құқылы азаматы ретінде барлық арман-мақсаттарыма жетіп келемін. Бүгінде бақытты әкемін, немерелерім де қазақ жерінде өсіп жатыр, кәсібім де өркендеп келеді. «Иверия» грузин этномәдени бірлестігі жанынан құрылған балалар би ансамблі Ассамблея жиынында өнерлерін көрсетті. Бұл – біз үшін үлкен мәртебе. 2012 жылы құрылған ансамбль мен хор облыста өтетін барлық мәдени шаралар мен республикалық, халықаралық байқауларға қатысып, жоғары марапаттар иеленіп жүр. Өткен жылы да Астанада «Бейбітшілік пен келісімнің 25 жылдығы» атты этномәдени фестивальге қатысты. Енді ЭКСПО қонақтарына өнерлерін көрсетуге дайындық үстінде. Өз ұлтымыздың құндылықтарын, дәстүрі мен салтын осылайша дамытып, насихаттау үшін Қазақстанда барлық жағдайдың жасалғаны бізді шын қуантады.
Облыстағы 17 этномәдени бірлестіктің барлығы да қоғам өміріне белсенді атсалысады. Атыраудағы Достық үйі бейбітшілік пен бірліктің ордасына айналды. Еліміз тыныш, жағдайымыз жақсы, менің ойымша бақыт деген – осы!
Зураб БОБОХИДЗЕ,
«Иверия» грузин этномәдени бірлестігінің төрағасы
АТЫРАУ
