Жиынға Семей, Павлодар, Өскемен, Курчатов қалаларындағы әскери бөлімдердің жауынгерлері қатысты. Олар радиациялық, химиялық, биологиялық қорғаныс мәселелері бойынша сынға түсті.
– Әрине, далада жаттығу жұмыстарын өткізу оңай болмады, – дейді Ұлттық ұланның «Шығыс» өңірлік қолбасшылығы баспасөз қызметінің жетекшісі Бағдат Амангелді. – Ауа райы тосын мінез танытса да жауынгерлер талап үдесінен шыға білді. Оқу бағдарламасы толық орындалды деп айта аламыз. Далада әскери қызметкерлер әскери техника мен қару-жарақтарды, жеке құрамды түрлі радиациялық, химиялық, биологиялық қалдықтардан тазартты. Және осындай қауіпті заттардың қай жерде бар екендігін де анықтай алды.
Полигондағы жаттығу жұмыстары аяқталған соң, қорытынды есептері тапсырылды. Сондай-ақ, Қорғаныс министрлігі «Шығыс» өңірлік қолбасшылығындағы радиациялық, химиялық, биологиялық (РХБ) қорғанысы қызметінің басшысы, полковник Қайрат Тұрғынбеков пен Ұлттық ұланның «Шығыс» аймақтық қолбасшылығындағы РХБ қорғанысы қызметінің жетекшісі, подполковник Абай Қасенов оқу-жаттығу жұмыстарының нәтижесі бойынша эстафета өткізді.
– Мен бірінші рет РХБ қорғанысы дегеннің не екендігін тәжірибе барысында көрдім, себебі осындай далалық полигон жұмыстарына тұңғыш рет қатысуым, – дейді Ұлттық ұланның «Шығыс» аймақтық қолбасшылығының 6679 әскери бөліміндегі РХБ қорғанысы қызметінде дозиметрші-маман, қатардағы жауынгер Мирас Қалиев. – Алдағы уақытта осы Ұлттық ұлан мен өңірлік қолбасшылық бірігіп, түрлі апатты жағдай орын алған жерлер болса, сондай қауіпті аймақтардағы радиациялық, химиялық, биологиялық зиянды заттарды қауіпсіздендіріп, тазартуға мүмкіндіктері бар деп ойлаймын.
– Біздің осындай жұмыстарымыз мамандарымыздың кәсібилігін арттыруға көмектеседі деп ойлаймыз, – дейді Ұлттық ұланның «Шығыс» аймақтық қолбасшылығындағы РХБ қорғанысы қызметінің жетекшісі, подполковник Абай Қасенов. Полигондағы жаттығулардың нәтижесінде Ұлттық ұланның «Шығыс» өңірлік қолбасшылығы бірінші орынды жеңіп алды.
Раушан НҰҒМАНБЕКОВА
СЕМЕЙ
