Іс-шара оқушылар арасында ғылыми-техникалық шығармашылықты дамыту, жоғары технология және инновация саласына қызығушылықты арттыру, болашақ мамандықты таңдаудағы пәнаралық байланысты нығайту мен робототехника бойынша мұғалімдердің кәсіби дамуын арттыруды көздейді. Сондай-ақ робототехникалық жүйені құру бойынша перспективалық ғылым және техника саласына назар аудару, қазіргі замандағы ғылыми-техникалық шығармашылықты дамыту мақсатында ұйымдастырылған олимпиадаға Астанадағы 18 мектептен 100-ден аса оқушы қатысуда.
12 жылдық тарихы бар World Robot Olympiad - робототехника бойынша мектеп оқушылары мен студенттер арасында өтіп келе жатқан дүниежүзілік жарыс. Оның Қазақстандағы операторы болып саналатын Назарбаев Зияткерлік мектептері халықаралық байқауға жіберілетін ұлттық команда құрамына жауапты. Желілік олимпиада еліміздің әр аймағында бір уақытта басталып, оқушылары өз роботтарының мүмкіндіктері мен ерекшеліктерін көпшілікке таныстырып жатыр.
