Әлемдік музыканың әйгілі дүлдүлі – Астанада

Қазақстан халқының бірлігі күні елордадағы Қазақстан орталық концерт залында оныншы Мәскеу Пасха фестивалі шеңберінде Санкт-Петербургтегі әйгілі Мария театры­ның симфониялық оркестрінің кеші өтті. Концертке Мемлекет басшысы Нұрсұлтан Назарбаев қатысып, оркестрдің өнерін тамашалады. Президент Нұрсұлтан Назарбаев концерт басталар алдында симфониялық оркестрдің көр­кем­дік жетекшісі әрі бас дирижері Валерий Гергиевке қазақстандық кадрларды дайындаудағы және оның Қазақстанға деген сүйіс­пен­шілігіне деген алғысын білдірді. Мемлекет басшысы одан әрі Валерий Гергиевтің жоғары дең­гейдегі марапаттар мен көп­теген халық­ара­лық сыйлық­тар­дың иегері екенін, оның 22 жылдан бері Мария теа­трының бас дирижері қызметін ат­қарып жүргенін айта келіп, Қазақ­стан орталық концерт залында қонақтарды таныстыра кетті. «Жаңа астана­мыз­дағы мұндай зал еуразиялық суб­кон­тиненттің ешбірінде жоқ. Ита­лия­лық мықты архитек­тор­лар­дың қатысуымен салынған, сыйым­дылығы 3500 ор­ынды қамтитын концерт за­лы­ның акус­тикасы да халықаралық стан­дарттарға сай. Алдағы уақытта сізді Қазақ ұлттық опера теа­тры­ның ашылу рәсіміне шақырамыз. Сіздің ұжымыңыз бен біздің музы­канттардың достығы әрі қарай жақсы деңгейде жалғасын табады деген сенімдемін», дей келе Валерий Гергиевке Қазақ­станның еңбек сіңірген қайрат­кері атағының берілгенін хабарлап, оған оның төсбелгісі мен куәлігін тапсырды. Есімі әлемге танымал дирижер Валерий Гергиев Қазақ елінің жаңа астанасының сұлулығы мен даму қарқынына таңданысын жасырмады. Бұл туралы ол елордада Мария театры симфониялық оркестрінің концерті қарсаңында өткен баспасөз мәслихатында: «Астанаға келген үш сағаттың ішінде мен тіпті барлық теңеуді айта алар емеспін. Қаланың қар­қынды өсуі мен дамуы ең көркем сөздермен ғана бағалануға лай­ық­ты», десе осы жиын үстінде  Қа­зақстан Республикасының Мәде­ниет министрі Мұхтар Құл-Мұ­хаммед журналистер қау­ы­мын оркестр ұжымымен, оның көркем­дік жетекшісінің музыка әлемін­дегі орнымен кеңірек таныстыра келіп: «Валерий Гергиев –  осы за­ман­дағы ұлы дири­жерлердің бірі. Ол Мария театры симфониялық оркестрінің дирижері ғана емес, әлемдік мәде­ниеттің дамуына мол үлес қосқан тұлға», деп атап өтті. Сонымен қатар, министр қазіргі таңда әлем­нің көптеген опера театр­лары­ның қаржы дағдарысына душар болып отырғандығын, ал Санкт-Петербург пен Астана қа­ла­сында опера театрларының құ­ры­лысы қарқынды жүріп жат­қандығын да тілге тиек етті. Валерий Гергиев Қазақ­стан­ның еңбек сіңірген қайраткері ата­ғының өзіне берілгені үшін Елбасына алғысын білдіре келе: «Сізді алғаш көргенімде мен жас дирижер болатынмын. Бү­гін­де міне, өзіңізбен бетпе-бет таны­сып, өз қолыңыздан осынау мәр­те­белі сыйлықты алып отыр­ғаныма алғысым шексіз. Сізбен әлі де кездесемін деген ойдамын. Баршаңызға денсаулық, бақыт, табыс тілеймін!»,  деді. Фестиваль аясы Ресейдің 40 қаласы мен Литва, Украина, Беларусь Республикасы және Қа­зақ­станды да қамтығанын айтсақ,  24 сәуір мен 9 мамыр аралығына жоспарланған 16 күн ішінде 100-ден аса концерті берілмек көрі­неді. Тағы бір қуантарлығы, Ас­танадағы концертте Ресейдің та­лантты пианисі Денис Мацуев пен танымал опера әншілері де өнер көрсетті. Концерт бағдар­ла­масына сай бұл күні жұртшылық әлемдік музыканың әйгілі шы­ғармаларын тыңдаған болса, кон­церттің шымылдығы Р.Ще­дрин­нің шы­ғармасымен ашылды. Музыка әлемінде Валерий Гер­гиев есімін білмейтін адам  кем­де-кем десе де болады. Әри­не, тек музыканттар қауымы ғана емес, жалпы жұртшылық та оның әр концертін асыға күтеді. Тума таланттың өнеріне деген сағы­ныш та осы кеш барысында ай­қын байқалған болса,  Мария театрының симфониялық оркестрі де көп көңіліне қарыз болып қалған жоқ. Жоғары кәсіби шеберлігі мен өз деңгейін көрермен­дерге  алғашқы шығармасынан-ақ бай­қатты. Көп­шілік қауым жет­піске жуық му­зыканттарды қам­титын оркестр­дің жанды дау­сын естіп, ғажайып әлемге сапар шек­ті.  Іргетасы сонау ХVІІ ғасыр­да қа­ланған театрдың симфониялық оркестрі, оның дирижері Валерий Гергиев туралы айта берсе, сөз таусылмайды. Дара талант ие­сінің  кез келген концерті ерекше, әрі кез келгені тамаша шоуға айналатыны әлем тарапынан мой­ындалған.  Ең бастысы, музы­ка сүйер қауым көрнекті дирижер­дің әр  концертін асыға күтеді. Елордада өткен кештің де ең әсерлі сәті фортепианоға арнал­ған концерт барысында айқын­дала түсті. Мұнда Денис Мацуев қалың жұртшы­лыққа пианино ар­қылы әлемдік музыканың әйгілі классикасын тарту етті. Концерт соңы Екатерина Семенчуктың орындауында орыс және шетел композиторлары опера­ларының үзін­ділерімен аяқталды. Музы­каны мәдениеттің биік шыңы деп білетін қауым үшін бұл кеш ерекше сый болды. Бір айта кететін жайт, сим­фониялық оркестрдің концерті Алматы қаласында да өтті. Жұлдыз БАЙДІЛДА.