«Екі езу» езу жиғызбады

Биылғы ел тәуелсіздігінің жиыр­ма жылдық мерекесі қар­саңын­да елімізде түрлі іс-шара­лардың өтетіндігі белгілі. Бұдан өнер са­ласы да қалыс қалмақ емес. Осы­ған орай төл мереке­нің құрметіне ақтөбелік «Екі езу» әзіл-сықақ театры гастрольдік сапарын елі­міз­дің жүрегі Астанадан бастады. Рас, елордаға келіп, елімізге белгілі әзіл-сықақ театрлары ауық-ауық өз өнер­лерін бұған дейін де көрсеткен. Алайда «Екі езудің» тәуел­сіз­дігіміздің торқалы тойына тарту ретіндегі арнайы бағдар­ламамен келуін ерекше атаған жөн. Сонымен, «Екі езу» әзіл-сықақ театры Конгресс-Холлға жинал­ған елорда жұршылығын ерекше көңіл күйге бөледі. – Айтулы мерекеге орай елі­міздің барлық өңірлерін аралап, көрермендерге шат күлкі сый­лай­­мыз деген мақсатпен жоспар­лан­­ған сапарымызды, міне, ел­ор­дадан бастап отырмыз. Біздің қолы­мыз­дан келетіні – көрер­мен­ге күлкі сыйлау. Сөйтіп, қар­лығаш­тың қа­на­тымен су сепкендей төл мерекеге өз үлесімізді қоссақ деп отыр­­мыз, – деді театр ди­ректоры Нұрлыбек Жұбатқан. Сахна әртістер әзірлеген әзіл ән­дер­мен ашылды. «Жанжал», «Тер­ритория», «Біз тауып береміз», «Үйлену», «Тастанды шарана» атты интермедиялар арқы­лы қоғамда болып жатқан түрлі ке­леңсіз құбылыстарды өткір тілмен жеткізуі де әртістер шебер­лігінің шыңдала түскенін көрсет­кендей. Енді жоғарыдағы «Тас­тан­ды шарана» атты шығар­маға қысқаша тоқталар болсақ, қазіргі таңдағы тастанды сәбилер­дің шетелдік бала асырап алушы­ларға беріліп, ойнақтап жүріп от басқан жастарымыздың тасбауыр болып бара жатқандығын әжуа­мен келтіреді. Күлдіріп отырып, күңірентіп жіберетін осындай қойылымдар кім-кімді де бейжай қалдыр­май­тыны анық десек, «Біз тауып береміздегі» қазақ тілінің мүшкіл халінің бейнесі, «Басып алу» атты монологта қазақ­тың кейбір ғажап сөз­дері жастар арасында жағымсыз жаргон тіліне алмастырылып бара жатқандығы ащы баяндалса, «Кө­рермен» дү­ние­сі де күлдіріп отырып ой­лан­тады. Алғаш 1998 жылы күлкі клу­бы болып құрылған «Екі езу» әзіл-сы­қақ театры 2011 жылдың сәуі­рінде Ақтөбе облыстық әкім­ді­гінің қол­дауымен мемлекет құ­зы­рына өтіп, эстрадалық миниатюра театры бол­ған екен. Бүгінде театрда жалпы саны жиырмаға жуық адам жұмыс жасайды. Атал­ған театр өздерінің таланттары мен та­бан­ды еңбек­терінің арқа­сында 2002 жылы халықаралық «Шабыт» шығарма­шыл жастар фестивалінде Гран-При жүл­де­сін жеңіп алыпты. Сондай-ақ бірінші республикалық байқауда бірінші орынды иеленген көрі­неді. Сөйтіп, құрылғалы бергі он үш жылдың ішінде театр елі­міздің түпкір-түпкірін аралап, шал­ғай­дағы ауылдардағы аға­йын­дардың да ризашылығына бө­леніп келеді. «Екі езуді» айтқан кезде оның іргетасын қалауда зор ең­бек сі­ңір­­ген Бақыт Айтова, Гүл­сім Қа­ра­таева сынды әртіс­терді айна­лып өте алмаймыз. Қа­зіргі кездері кө­рермендерін күлкімен көм­ке­ріп, олардың ри­за­шылы­ғына бө­ле­ніп жүрген театрдың дирек­то­ры Нұр­лыбек Жұбатқан мен Құ­рал­бек Құр­манғалиев, Берік Нұр­маған­бетов, Бекбол Тәтебаев секілді әртіс­тер театр­дың жаңа бағ­дар­ла­маларын жасау бары­сын­да ты­­ным­сыз ізденіс үстінде жүр. «Астанадан басталған осы­­­­нау шара алдағы уақытта біздің шығар­машылық жұмысы­мызға өзіндік серпін береді», дейді олар. Әбдірахман ҚЫДЫРБЕК. _______________________ Cуретті түсірген Ағыбай АЯПБЕРГЕНОВ.