Ұйымдар шеңберіндегі ұйысу

Кеше Сыртқы істер министрлігінде аталған ведомствоның ресми өкілі Асқар Абдрахмановтың қатысуымен дәстүрлі апталық брифинг өтті. Ресми өкіл өз сөзінде Алматыда Шанхай ынтымақ­тастық ұйымына мү­ше мемлекеттер Ұлттық үйлесті­рушілер кеңесінің кезекті отырысы өтіп жатқанын, мә­жіліске қаты­сушылар биылғы жылдың 14 мамы­ры күні Алматыда өтетін Шанхай ұйы­мына мүше мемлекеттер Сыртқы iстер министрлерінің  кеңесіне және 15 мау­сым­да Астанада өтетін ұйым­­­ның 10 жылдығына арналған мерей­тойлық саммитке дайындық бары­сы талқыланып жатқанына тоқталды. Ал 14 мамырда Алматыда өтетін Шанхай ұйымына мүше мемлекеттер Сыртқы істер министрлері кеңесінің кезекті отырысы аясында Ұйым құрылуының он жылдығына арнал­ған мерейтойлық саммитке дайындық барысын талқылау, өзекті халық­ара­лық және аймақтық мәселелер бо­йынша пікір алмасу көзделіп отыр. Министрлер  Шанхай ұйымы қызме­тінің ағымдағы мәселелерін қарас­тырып, оның шешімдерінің жүзеге асырылу тетігін қамтамасыз ететін болады. Сонымен қатар, көпжақты ынтымақ­тастықты дамыту және жетілдіру мәселелерін ШЫҰ-ға мүше Мемлекеттер бас­шылары кеңесінің қарауына ұсынуы тиіс, деді А.Абдрахманов. Брифинг барысында сондай-ақ 12 және 14 мамыр аралығында НАТО Бас хатшысының Орталық Азия және Кавказ жөніндегі арнайы өкілі Джеймс Аппатурайдың Астанаға жұ­мыс сапары болатындығы айтылды. Бірқатар министрліктер мен ведомстволарда өткізілуі жоспарланған кездесулер барысында шетелдік мейман Қазақстан мен Солтүстік-Атлан­тика альянсы арасындағы Әріп­тестік іс-қимылдарының жеке жоспары аясын­дағы ынтымақтас­тықты талқы­лап, Орталық Азиядағы ағымдағы саяси жағдай жөнінде пікір алма­сады екен. Брифинг барысында 13-14 мамыр күндері Ресей Федерациясы­ның Сырт­қы істер министрі Сергей Лавровтың Қазақстанға жұмыс сапа­рымен келетіні де белгілі болды. Бағдарламаға сәйкес, көрші елдің сыртқы саясат ведом­ствосының жетекшісін Қазақ­стан Президенті Нұр­сұл­тан Назарбаев қабыл­дайды. Сон­дай-ақ, ресейлік дипломат­тың Қазақ­стан Сыртқы істер министрі Ержан Қазыхановпен келіс­сөзі жоспар­ланған көрінеді. Тараптар саяси, сауда-экономи­ка­лық және мәдени-гуманитарлық сала­лардағы Қазақстан-Ресей ынты­мақ­тастығының қазіргі жағдайы мен даму болашағын қарастырып, халық­аралық күн тәртібіндегі өзекті мәсе­лелерді және ТМД, ЕурАзЭҚ, АӨСШК және БҰҰ сияқты халық­аралық бірлестіктер аясындағы екі­жақты ынты­мақтас­тықты талқылап, Орталық Азияда тұрақтылық мен қауіпсіздікті нығайту шаралары мен Каспий теңізі мәсе­лелері төңірегінде пікір алма­сатын болады», деді ресми өкіл. Ләйла ЕДІЛҚЫЗЫ.