Бұл мерейтой бұрынғыдан өзгерек

Алдағы тамыз  айында дауылпаз ақын Қасым Аманжоловтың туғанына 100 жыл толуы мерейтойы Қарағандыда басталып, кіндік қаны тамған  топырағы Қарқаралыда өткелі отыр. Бұл күнде өңірде осы айтулы оқиғаны сән-сал­танатпен өткізуге әзірлік қызу жүргізілуде. Оның барысы туралы  облыстық мәдениет бас­қарма­сының бастығы Бекболат БАЙСАҒАТОВТЫ әңгі­меге тартқан едік. – Білетініміздей дайын­дық жыл басынан-ақ қолға алынған екен. Алдымен содан беріде атқарылған іс-шара­лар­ға тоқталып өтсеңіз. – Бұл халқымызға ортақ ме­­рейтой болғандықтан елімізде жаппай аталып өтуі үшін қаңтар айын­да Үкімет қаулысы қабыл­дан­ды. Соған сәйкес ол бір мезгілдік ғана шара емес, жыл ая­ғына дейін Қа­сым ақын рухы мен жырының жаң­ғыруы жалға­сады. Білім беру орын­дарында, мә­де­ниет ошақтарында өмірі мен шы­ғармашылығына ар­на­­лып ұйым­дастырылған ғылы­ми-практи­ка­лық конференциялар, поэ­зия кештері, кітап көр­мелері басқа да мәдени-көпшілік шара­лар­ға ұла­сып, асыл мұрасы жаңа­дан жарқы­рап таны­лып жатыр. Аймақта қай өнер ортасы да өз тартуларын арнауға жұмы­лу­да. Ақпан айында Сәкен Сейфуллин атындағы Қазақ драма театрында ақынның «Досымның үйленуі» комедиясы сахналанса, жақында жезқазғандық әртістер шығармалары бойынша «Дү­ние­ге келер әлі талай Қасым» тақырыбымен қойылымды көр­сетті. Мамырдың 12-13 күн­дерін­де жас ізбасарларының об­лыстық мүшәйрасы өтті. Сондай-ақ «Кө­ңіл­дің күйін төгейік» ән байқауы сан қырлы тұлғаның ән-саздық мұрасын алдыға тағы бір жайды. Бүгінде ол жеке дискі етіп шы­ғарылуға дайын, сонымен бірге таңдамалы өлеңдерінің бір том­дығы мерейтойға дейін оқыр­ман­дар қолына тимек. – Бекболат, сөз орайында мерекенің нақты қай күндерге белгіленгенін айтсаңыз. Ол қашан, қалай басталады? – Арқада тамыздың ортасы әдет­те тамылжыған кез ғой. Сон­дық­тан тамыз айының 17-20 ара­лығы қолайлы саналды. Елі­міз­дің барлық өңірлерінен келетін меймандар Қарқаралының әсем таби­ға­ты аясында халқымыздың аяулы перзенті мерейтойы дүбі­рін қы­зықтай алады. Салтанат шымылдығы Қасым Аманжоловтың Қарағандыда бой кө­теретін ескерткішіне тағзым ету­мен ашылады. Айта кету керек, бейнесін көз алдыға келтіретін ең­селі мүсін Сәкен Сейфуллин көше­сінің қиылысынан орталық саябаққа кіреберіс тұста орна­тылуда. Облыс ор­та­лығында өте­тін мерейтойлық жиыннан соң салтанат Қарқара­лы­­ға, ақын атындағы ауылға ауы­сады. – Жиналушыларды қан­дай рәсімдер күтіп тұр? – Әлбетте бағдарлама ая­сы ауқымды. Өнер саласы мен ұлт­тық спорт ойындары тойдың бас­ты сәні мен көркі болмақ. Ақын­дардың республикалық мүшәйра­сы тақырыбы Қасым­ның қазақ поэ­зиясындағы ор­нын ашып көр­сетуге арналады. Оған жас айыр­ма­шылықтарына қарамастан қай өлкеден де қан­дай да талапкер қатысуға ерікті екенін айта кеткен жөн шығар. Осы жыр додасы жеңімпаз­дары­на белгіленген сый-сияпат бар. Көзге түскен өлең-жырлар жыл аяғына дейін жинақ болып шы­ғарылады. Ал өнер дүл­дүлде­рі­нің дүбірлі думаны өз ал­дына бір бөлек. Ат жарысы мен балуандар сайысы той қызы­ғын қыздыратыны талассыз. Қазір мерейтойға дайындық облыс басшыларының күнбе-күнгі тікелей назарында. Соған байланысты көп мәселелер оң шешімін тауып келеді. Қасым Аманжоловтың есімі мен жыры халқының жады мен жүрегінен берік орын алып, өш­пеуге айналғанына уақыт куә. Қазақ поэзиясының шоқ жұлды­зын­дай әрдайым жарқыратып тұ­ратын ұлы ақынның дүниеге келген ғасырлық мерейтойы ұмыл­мастай есте қалатыны хақ. Әңгімелескен Айқын НЕСІПБАЙ, Қарағанды.